ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ ၅ ရဲ့ ဗျူဟာမှူးအသစ်အဖြစ် ကာကွယ်ရေးတပ်ရင်းမှူးနဲ့ ထောက်လှမ်းရေးတာဝန်ထမ်းဆောင်ဖူးခဲ့တဲ့ ဗိုလ်မှူးကြီးစောမော်ဒဲကို တာဝန်ပေးခန့်အပ်လိုက်ပါတယ်။
မကြာသေးခင်က ကေအဲန်ယူ-မူတြော်(ဖာပွန်)ခရိုင် တပ်မဟာ ၅ နယ်မြေအတွင်းမှာရှိတဲ့ စစ်ကောင်စီရဲ့ကျောက်ညှက်စခန်းသိမ်းတိုက်ပွဲမှာ ကျဆုံးသွားခဲ့တဲ့ တပ်မဟာ ၅ ဗျူဟာမှူးစောထူးကရှောနေရာမှာ ဗိုလ်မှူးကြီးစောမော်ဒဲကို တာဝန်ပေးခန့်အပ်တာဖြစ်ပြီး ဗျူဟာမှူးသစ်ဟာ ဖာပွန်ဇာတိသားဖြစ်တယ်လို့ တပ်မဟာ ၅ သတင်းရင်းမြစ်ကပြောကြားကြောင်း Salween Press မှာ ရေးသားဖော်ပြထားပါတယ်။
ဗျူဟာမှူးအသစ်ဖြစ်သူ ဗိုလ်မှူးကြီးစောမော်ဒဲဟာ KNLA ဒုတိယစစ်ဦးစီးချုပ် ဒုတိယဗိုလ်ချုပ်ကြီးစောဘောကျော်ဟဲရဲ့ ယုံကြည်အားထားရသူဖြစ်ပြီး အရင်က ကာကွယ်ရေးတပ်ရင်းမှူးတာဝန်ယူခဲ့ဖူးသလို ထောက်လှမ်းရေးလုပ်ငန်းတွေကိုလည်း လုပ်ကိုင်ဆောင်ရွက်ခဲ့ဖူးတယ်လို့ Salween Press မှာ ဖော်ပြထားပါသေးတယ်။
ဗိုလ်မှူးကြီးစောမော်ဒဲကို ဗျူဟာမှူးအဖြစ် တာဝန်ယူတာ ဟုတ်မှန်ကြောင်းနဲ့ ဗျူဟာမှူးအသစ်ဟာ စစ်ရေးအတွေ့အကြုံရင့်ကျက်သူတစ်ဦးဖြစ်တယ်လို့လည်း တပ်မဟာ ၅ နဲ့ နီးစပ်သူတစ်ဦးထံကနေ သိရပါတယ်။
“ကောင်းပါတယ်(စစ်ရေးတိုက်ခိုက်ရေး)၊ တဆင့်တဆင့်တက်လာတာ” လို့ တပ်မဟာ ၅ နဲ့ နီးစပ်သူတစ်ဦးက ပြောပါတယ်။
ပြီးခဲ့တဲ့ ဧပြီလ ၂၈ ရက်နေ့က ကေအဲန်ယူ-မူတြော်ခရိုင် သံလွင်မြစ်အနီးမှာရှိတဲ့ စစ်ကောင်စီရဲ့အခိုင်အမာစခန်းတစ်ခုဖြစ်တဲ့ ကျောက်ညှက်စခန်းသိမ်းတိုက်ပွဲမှာ KNLA တပ်မဟာ ၅ ဗျူဟာမှူးဖြစ်သူ ဗိုလ်မှူးကြီးစောထူးကရှော ကျဆုံးသွားခဲ့တာဖြစ်ပြီး အဲ့ဒီစခန်းကိုလည်း သိမ်းပိုက်ရရှိသွားခဲ့တာ ဖြစ်ပါတယ်။
မူတြော်ခရိုင်အတွင်းမှာ ဧပြီလ တလတာအတွင်း KNLA တပ်မဟာ ၅ နဲ့ စစ်ကောင်စီ နယ်ခြားစောင့်တပ်(BGF) တပ်တို့အကြား တိုက်ပွဲပေါင်း အကြိမ် ၄၀၀ နီးပါးဖြစ်ပွားခဲ့ပြီး စစ်ကောင်စီဘက်က ၁၇၀ ကျော်သေဆုံးခဲ့ကာ စစ်ကောင်စီဘက်က သေဆုံးသူတွေထဲမှာ တပ်ရင်းမှူးနဲ့ ဒုရင်းမှူးအဆင့်ရှိသူတွေ ပါဝင်ခဲ့တယ်လို့ မူတြော်သတင်းစဉ်က ထုတ်ပြန်ထားတာဖြစ်ပါတယ်။