ချင်းပြည်နယ် ဟားခါးမြို့မှ ဖလမ်းမြို့သို့ ထွက်ခွာလာသည့် စစ်ယာဉ်တန်းကို မေလ ၄ရက် နှင့် မေလ ၆ရက်နေ့တို့တွင် တိုက်ခိုက်ခဲ့ရာ စစ်ကောင်စီတပ်မှ ၁၄ဦး ခန့်သေဆုံးခဲ့သည်ဟု ချင်းအမျိုးသားအဖွဲ့ချုပ်(CNO/CNDF)က သတင်းထုတ်ပြန်သည်။
သံချပ်ကာယာဉ် ၂စီး အပါအဝင် ယာဉ်စီးရေ ၂၀ကျော်၊ အင်အား ၁၇၀ ခန့်ပါသည့် စစ်ကောင်စီယာဉ်တန်းကို မေလ ၄ရက်တွင် ဖလမ်းမြို့နယ် ဒေါက်ထက်ရွာအနီးတွင် ချင်းအမျိုးသားကာကွယ်ရေးတပ်(CNDF) ပါဝင်သည့် ကာကွယ်ရေးပူးပေါင်းတပ်က မိုင်းဆွဲတိုက်ခိုက်ခဲ့ ရာစစ်ကောင်စီတပ်မှ ၆ဦးခန့်သေဆုံးခဲ့သည်ဟု ဖော်ပြထားသည်။
အလားတူ မေလ ၆ရက်နေ့တွင်လည်း တားလ်ကျေးရွာအကျော၌ CNDFမှ ထပ်မံ၍ ပဒေသာမိုင်းဖြင့် တိုက်ခိုက်ခဲ့ရာ စစ်ကောင်စီတပ်မှ ၈ဦးခန့်သေဆုံးပြီး ဒဏ်ရာရသူများလည်းရှိကြောင်း CNOက ထုတ်ပြန်သည်။
အဆိုပါတိုက်ခိုက်မှုများတွင် CNDF တပ်ဖွဲ့ဝင်များ ထိခိုက်မှုမရှိ ဆုတ်ခွာနိုင်ခဲ့သော်လည်း မေလ ၇ရက်တွင် မိုင်းရှင်းလင်းစဉ် CNDF ရဲဘော်တစ်ဦး မိုင်းမတော်တဆဖြစ်၍ ကျဆုံးခဲ့ကြောင်း အသိပေးထားသည်။
Public Service Announcement
အဆိုပါ စစ်ကောင်စီတပ်ယာဉ်တန်းကို ချင်းအမျိုးသားတပ်မတော်(CNA)နှင့် ချင်းကာကွယ်ရေးတပ်(CDF) ပူးပေါင်းတပ်ကလည်း မေလ ၃ရက် ညနေပိုင်းကတည်းက ခြုံခိုတိုက်ခိုက်မှုများ လုပ်ဆောင်ခဲ့သည်။ မေလ ၄ရက်နေ့ မနက်ပိုင်းက တလန်ဇာရ်ရွာအနီး တိုက်ပွဲမှာ ပြင်းထန်ခဲ့ရာ စစ်ကောင်စီတပ်မှ ၁၈ဦး သေဆုံးခဲ့ပြီး CNA နှင့် CDF ရဲဘော် ၉ဦးလည်း ကျဆုံးခဲ့ကြောင်း ချင်းဒေသခံတစ်ဦးက ပြောကြားထားသည်။
CNDFသည် ဖလမ်းမြို့နယ်နှင့် ဆက်စပ်ဒေသများ၌ စစ်ကောင်စီတပ်များကို ခုခံတိုက်ခိုက်မှုများ ဆက်တိုက်ပြုလုပ်လျက်ရှိသည့် ချင်းလက်နက်ကိုင်တပ်ဖွဲ့ဖြစ်သည်။
