●ပကာရီရဲစခန်းကို PDFများကတိုက်ခိုက်ဖျက်သိမ်းခဲ့၍ ပကာရီရွာကိုတိုက်ခိုက်ရန်စစ်တပ်ကသဗျာရွာကိုဦးစွာတိုက်နေခြင်းဖြစ်
ထားဝယ်မြို့မှာ ၅ မိုင်အကွာရှိ သဗျာရွာတွင် ဒေသခံကာကွယ်ရေးတပ်များကို စစ်ကောင်စီတပ်က တင့်ကားနှစ်စီးအပါအဝင် စစ်အင်အားအလုံးအရင်းဖြင့်ထိုးစစ်ဆင်နေ၍ တိုက်ပွဲများပြင်းထန်နေကြောင်း ဒေသခံများကပြောသည်။
ယနေ့ (မေ ၉ ရက်) ညနေ ၄နာရီတွင် တိုက်ပွဲစတင်ဖြစ်ပွားခဲ့ပြီး ညဦးပိုင်းမှစ၍ စစ်ကောင်စီတပ်က တင့်ကားနှစ်စီးအပါအဝင် စစ်အင်အားအလုံးအရင်းဖြစ်အင်အားဖြည့်တင်းကာ ထိုးစစ်မြှင့်နေခြင်းဖြစ်သည်။
“တင့်ကားနှစ်စီးနဲ့ စစ်ကား ၈ စီးလောက်ကထားဝယ်မြောက် သပြေချောင်းရွာကနေ ပကာရီရွာဘက်ကိုအခုညမှာဝင်သွားတာတွေ့ရတယ်”ဟု ဒေသခံတစ်ဦးကပြောသည်။
စစ်ကောင်စီတပ်များသည် ယမန့်နေညကတည်းက သဗျာရွာအတွင်းကို ဝင်ရောက်နေရာယူထားခြင်းဖြစ်သည်။ သဗျာရွာအနီးရှိတလိုင်းတောင်ရွာ၊ ကသန်းရွာတို့တွင်လည်း အင်အား ၁၀၀ကျော်ခန့်ဖြင့် နေရာဖြန့်ထားပြီး ရွာအပြင်များတွင် မြေမြှပ်မိုင်းများ ထောင်နေသည်ဟု ဒေသတွင်းသတင်းဌာနများတွင်ရေးသားထားသည်။
အကြမ်းဖက်စစ်ကောင်စီတပ်က ပကာရီရွာကိုအင်အားအလုံးဖြင့်ပိတ်ဆို့ စစ်ကြောင်းထိုးနိုင်ရန်အတွက် သဗျာရွာကိုတိုက်ခိုက်နေခြင်းဖြစ်ကြောင်းဒေသခံကာကွယ်ရေးတပ်များနှင့် နီးစပ်သူတစ်ဦးကပြောသည်။
“အခုဖြစ်နေတာ ပကာရီရွာမရောက်သေးဘူး သဗျာဆိုတဲ့ရွာဖြစ်နေကြတာ၊ တိုက်ပွဲအခြေအနေတော့ သေချာမသိသေးဘူး။ သဗျာရွာက ထားဝယ်မြို့နဲ့ လေး၊ငါးမိုင်ပဲ ဝေးတာ”ဟု ၎င်းကဆက်ပြောသည်။
စစ်ကောင်စီတပ်သည် အင်အားကြိုတင်ဖြည့်တင်းသောအခါ အရပ်သားဟန်ဆောင်၍ ခရီးသည်တင်ကားများကို အသုံးပြုခဲ့သည်ဟုလည်း ဒေသခံတစ်ဦးကပြောသည်။
ပကာရီရွာကို အကြမ်းဖက်စစ်ကောင်စီတပ်က သရက်ချောင်းမြို့နယ် ညောင်ဇင်ကျေးရွာဘက်မှလည်းစစ်ကြောင်းသုံးကြောင်းခန့်ဖြင့်ဝင်ရောက်နေပြီး အင်အား ၁၀၀ခန့်ရှိသည်ဟုလည်း သိရသည်။
ထားဝယ်-ထီးခီးလမ်းပေါ်ရှိ ပကာရီရဲစခန်းကိုPDFပူးပေါင်းတပ်က ဧပြီ ၂၄ နေလယ်ပိုင်းက ဝင်ရောက် စီးနင်းတိုက်ခိုက်မီးရှို့ ဖျက်သိမ်းခဲ့သည်။ ပကာရီရဲစခန်းကို ဝင်ရောက်စီးနင်းပြီးနောက် အဆိုပါဒေသသို့အကြမ်းဖက်စစ်ကောင်စီတပ်များက အင်အားအလွန်ကျွံသုံးပြုပြီး ထိုးစစ်ဆင်နေခြင်းဖြစ်သည်။