နွေဦးဆရာအတတ်သင်တက္ကသိုလ်ရဲ့ အဓိပတိအဖြစ် ဒေါက်တာသိန်းလွင်ကိုခန့်အပ်

မြန်မာနိုင်ငံရဲ့ ပညာရေးစနစ်ပြုပြင်ပြောင်းလဲနိုင်ဖို့အတွက် လှုပ်ရှားဆောင်ရွက်ခဲ့သူ ဒေါက်တာသိန်းလွင်ဟာ နွေဦးဆရာအတတ်သင်တက္ကသိုလ်ရဲ့ ပထမဦးဆုံးအဓိပတိဖြစ်လာပါတယ်။

NUG အစိုးရ အဖွဲ့မှာ ပညာရေးဝန်ကြီးတာဝန်ယူဖို့ကမ်းလှမ်းချက်ကို ငြင်းပယ်လိုက်ပြီး နွေဦးဆရာအတတ်သင်တက္ကသိုလ်ရဲ့ အဓိပတိတာဝန်ကိုသာယူခဲ့တယ်လို့ ဒေါက်တာသိန်းလွင်က သူရဲ့ဖေ့ဘွတ်ခ်ကနေ အသိပေးထားပါတယ်။

ပညာရေး ဝန်ကြီး အဖြစ်တာဝန်ယူဖို့ ဒေါက်တာဇော်ဝေစိုးက ကမ်းလှမ်းခဲ့ကြောင်း ၊ဒါပေမယ့် NUG ဟာ တော်လှန်ရေးတာဝန်ထမ်းဆောင်နေတာကြောင့် တော်လှန်ရေးကိုဦးဆောင်သူတွေသာ ဝန်ကြီးဌာနကို တာဝန်ယူသင့်တယ်လို့ ထင်မြင်ယူဆတဲ့တွက် ဒေါက်တာဇော်ဝေစိုးကိုသာ ပညာရေးဌာန ဆက်လက်တာဝန်ယူပေးဖို့အကြံပြုခဲ့တယ်လို့ ဒေါက်တာသိန်းလွင်က ပြောထားပါတယ်။

နွေဦးဆရာအတတ်သင်တက္ကသိုလ် ရဲ့အဓိပတိတာဝန်ကိုယူရတဲ့ရည်ရွယ်ချက်ဟာ ဆရာအတတ်ပညာရပ်တွေ ဖွံ့ဖြိုးတိုးတက်ဖို့ ၊ အရည်အသွေးရှိတဲ့ပညာရပ်တွေကို ပေးနိုင်ဖို့နဲ့ပညာရေးပြုပြင်ပြောင်းလဲရေးလုပ်ငန်းတွေ မှာ ပါဝင်ဆောင်ရွက်ဖို့ဖြစ်တယ်လို့ ဒေါက်တာသိန်းလွင်က ရှင်းပြထားပါတယ်။

Public Service Announcement

နွေဦးဆရာအတတ်သင်တက္ကသိုလ်ဟာ ပညာရေးတက္ကသိုလ်အသီးသီးက ဆရာ ၊ဆရာမတွေ စုပေါင်းတည်ထောင်ထားတဲ့ တက္ကသိုလ်လည်းဖြစ်ပါတယ်။

အဲဒီတက္ကသိုလ်ရဲ့အဓိပတိဖြစ်လာသူဒေါက်တာသိန်းလွင်ဟာ NLD ပညာရေးကွန်ရက်တာဝန်ခံတစ်ဦးဖြစ်ခဲ့သလို မြန်မာနိုင်ငံပညာရေးစနစ်ပြုပြင်ပြောင်းလဲရေးနိုင်ငံလုံးဆိုင်ရာကွန်ရက်(NNER) ရဲ့ကိုယ်စားလှယ်တာဝန်ယူခဲ့သူလည်းဖြစ်ပါတယ်။