နိုဝင်ဘာ-၅၊ ၂၀၂၆။မေရီ/People’s Spring
မန္တလေးတိုင်းက ကျောက်ဆည်တက္ကသိုလ်မှာ အဝေးသင်တက်မယ့်ကျောင်းသူတွေ မြန်မာဝတ်စုံဝတ်မလာရင် ကျောင်းထဲဝင်ခွင့်မပေးလို့ ကျောင်းသူတွေ အဆင်မပြေဖြစ်နေကြောင်း သတင်းရရှိပါတယ်။
ကျောက်ဆည်တက္ကသိုလ်မှာ ယခုနိုဝင်ဘာလအတွင်းဖွင့်လှစ်မယ့် အဝေးသင်အနီးကပ်သင်တန်းတွေမှာ ကျောင်းသူတွေအနေနဲ့ မြန်မာဝတ်စုံတမျိုးတည်းသာ ဝတ်ဆင်ကြဖို့နဲ့ အခြားဝတ်စုံ ဝတ်လာရင် ကျောင်းထဲဝင်ခွင့်မပေးဖို့ တက္ကသိုလ်ကနေ ထုတ်ပြန်ထားကြောင်း ကျောင်းသူတွေက ပြောပါတယ်။
“အခုမှ ဖြစ်သွားတာ။ အရင်အသုတ်တွေက ဘောင်းဘီဝတ်လို့ရတယ်။ ဒီနေ့သွားတာ ဘောင်းဘီအပွနဲ့အင်္ကျီလက်ရှည်တောင် မဝင်ရဘူးတဲ့။ ပြန်လှည့်ခိုင်းတာ”လို့ ကျောင်းသူတဦးက ပြောပါတယ်။
Public Service Announcement
ပြီးခဲ့တဲ့ အဝေးသင် အနီးကပ်သင်တန်းတချို့မှာ ကျောင်းသူတဦးက နောက်ကွဲအင်္ကျီနဲ့ Tiktok ဆော့ခဲ့တာကြောင့် ကန့်သတ်လိုက်တာဖြစ်နိုင်ကြောင်း ကျောင်းသူတွေက ပြောပါတယ်။
အခုလို မြန်မာဝတ်စုံသာဝတ်ဖို့ ကန့်သတ်လိုက်တာကြောင့် ကျောင်းသူအများစုဟာ အခက်အခဲ ဖြစ်နေတယ်လို့ သိရပါတယ်။
“မိန်းကလေးဆယ်ယောက်မှာ ရှစ်ယောက်လောက်က မြန်မာဝတ်စုံသိပ်ပါခဲ့ကြတာမဟုတ်ဘူး။ ဘောင်းဘီရှည်၊ စကတ်ရှည်ဝတ်လို့ရတယ်ဆိုလို့ လေးငါးစုံလောက်ပဲပါလာတာ။ စာမေးပွဲဖြေမယ့်အချိန်ပဲ မြန်မာဝတ်စုံဝတ်ဖို့ကန့်သတ်သင့်တယ်ထင်တာပဲ။”လို့ အခြား ကျောင်းသူတဦးက ဆိုပါတယ်။
စစ်တပ် အာဏာသိမ်းပြီးနောက် စစ်တပ်ထိန်းချုပ်မှုအောက်မှာ စာမသင်ကြဖို့ တိုက်တွန်းတာတွေရှိခဲ့ပေမဲ့ ယခုအခါမှာတော့ ဒေသတချို့က တက္ကသိုလ်တွေမှာ ကျောင်းတက်သူတွေ ပြန်များလာတယ်လို့ ဒေသခံတွေက ဆိုပါတယ်။
တချို့ကလည်း စစ်မှုထမ်းရှောင်ဖို့အတွက် ကျောင်းပြန်တက်လိုက်ရသူတွေလည်း ရှိတယ်လို့ ကျောင်းသား၊ ကျောင်းသူတွေက ပြောပါတယ်။
