တွေ့ဆုံစဥ် မြန်မာနိုင်ငံ၏ နောက်ဆုံးဖြစ်ပေါ်ပြောင်းလဲမှုအခြေအနေများကို အမြင်ချင်းဖလှယ်ခဲ့ပြီး အရပ်သားပြည်သူများလုံခြုံရေးအတွက် ဘက်အားလုံး၏ အပစ်အခတ်ရပ်စဲရေးကို လေ့လာစောင့်ကြည့်ရန် အရေးကြီးမှု၊ နိုင်ငံတကာပူပေါင်းပါဝင်ဖိတ်ခေါ်မှုဖြင့် လူသားချင်းစာနာမှုအကူအညီများအရေးပေါ်ပေးအပ်ရေးနှင့် လူသားချင်းစာနာမှုစကြ်ံန်ဖန်တီးရေးအပါအဝင် အရေးပါသည့်အချက်များအပေါ် သဘောတူခဲ့ကြောင်း မလေးရှားနိုင်ငံခြားရေးဝန်ကြီးက ၎င်း၏ ဖေ့စ်ဘုတ်မှ အသိပေးထုတ်ပြန်သည်။
မြန်မာပြည်သူများအပေါ်စာနာမှုပြသပြီး မြန်မာအရေးတက်ကြွပွင့်လင်းစွာပြောကြားလာသောမလေးရှားနိုင်ငံခြားရေးဝန်ကြီး သည် NUG နိုင်ငံခြားရေးဝန်ကြီးဒေါ်ဇင်မာအောင်နှင့် မေလ ၁၄ ရက်တွင်တွေ့ဆုံဆွေးနွေးခဲ့သည်။
ထိုသို့တွေ့ဆုံပြီး ၃ ရက်အကြာတွင် ဆာဆာကာဝါကလာရောက်တွေ့ဆုံခြင်းဖြစ်သည်။တွေ့ဆုံမှုတွင်အာဆီယံဘုံဆုံးဖြတ်ချက် ၅ ရပ်အကောင်အထည်ဖော်ရေးနှင့် မြန်မာနိုင်ငံတွင် ငြိမ်းချမ်းရေး၊ ဒီမိုကရေစီစနစ်ပြန်လည်အသက်သွင်းနိုင်ရေးအတွက် ပါဝင်သင့်ပါဝင်ထိုက်သူအားလုံးနှင့် ထိတွေ့ဆက်ဆံရေးတို့အတွက် အာဆံနှင့်အတူ ဂျပန်အစိုးရက အားပေးထောက်ခံရပ်တည်ကြောင်း ဆာဆာကာဝါက ပြောသည်။
နီပွန်ဖောင်ဒေးရှင်းဥက္ကဌ၏ အထက်ပါ မလေးရှားခရီးစဥ်သည် ဂျပန်အစိုးရ၏ အထူးကိုယ်စားလှယ်အဖြစ် သွားရောက်ခြင်း ဟုတ်၊ မဟုတ်ကို ရှင်းလင်းစွာ မသိရပေ။
မြန်မာနိုင်ငံတွင် စစ်အာဏာသိမ်းပြီးနောက်ပိုင်း၂၀၂၁ နိုဝင်ဘာလတွင် ဆာဆာကာဝါသည် နေပြည်တော်သို့ လာရောက်ပြီး အာဏာသိမ်းစစ်ခေါင်းဆောင်နှင့်တွေ့ဆုံသောခရီးစဥ်များသည် ဂျပန်အစိုးရ၏ အစီအစဥ်ဖြင့်သွားရောက်ခြင်းမဟုတ်ကြောင်း ဂျပန်နိုင်ငံခြားရေးတာဝန်ရှိသူက ပြောကြားဖူးသည်။
ဆာဆာကာဝါသည် အကြမ်းဖက်စစ်ခေါင်းဆောင်နှင့်ရင်းနှီးသည့်ဆက်ဆံရေးရှိပြီး ၂၀၂၂ မတ်လ ၁၀ ရက်တွင် အပစ်ရပ်လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့ခေါင်းဆောင်များနှင့် ထိုင်းနိုင်ငံ၊ ချင်းမိုင်မြို့တွင်တွေ့ဆုံပြီး စစ်ခေါင်းဆောင်နှင့် တိုင်းရင်းသားလက်နက်ကိုင်အဖွဲ့များအကြား စေ့စပ်ညှိနှိုင်းပေးရန် ကြိုးစားခဲ့သည်။ သို့သော်အဆိုပါတွေ့ဆုံဆွေးနွေးမှုမှာ စစ်ဘေးဒုက္ခသည်များအတွက်လူသားချင်းစာနာထောက်ထားမှု ဆိုင်ရာအကူအညီများပေးအပ်ရေးဆွေးနွေးသည်ဟုသာသတင်းထုတ်ပြန်ခဲ့သည်။
မတ်လ ၁၀ ရက်ချင်းမိုင်တွေ့ဆုံပွဲမတိုင်ခင်မတ်လ ၆ ရက်ကဆာဆာကာဝါသည် အာဏာသိမ်းစစ်ခေါင်းဆောင်နှင့် အွန်လိုင်းမှတစ်ဆင့်တွေ့ဆုံဆွေးနွေးခဲ့သေးသည်။ ချင်းမိုင်တွေဆုံပွဲတွင် တိုင်းရင်းသားလက်နက်ကိုင်အဖွဲ့များအပြင် စစ်ကောင်စီ၏ ငြိမ်းချမ်းရေးကိုယ်စားလှယ်များဟုအမည်ခံထားသူများဖြင့်ပါတွေ့ဆုံခဲ့ခြင်းဖြစ်သည်။
အာဏာသိမ်းစစ်ခေါင်းဆောင်မင်းအောင်လှိုင်နှင့်စစ်ကောင်စီကို နိုင်ငံတကာက အသိ့အမှတ်မပြုဘဲ ပစ်ပယ်ထားချိန်တွင် အာဏာသိမ်းခေါင်းဆောင်ထံဖုန်းဖြင့်တိုက်ရိုက်ဆက်သွယ်၍ပြောဆိုဆွေးနွေးနိုင်သူ လက်တစ်ဖက်စာမပြည့်သောစာရင်းတွင် ဆာဆာကာဝါ ပါဝင်ပြီး ၊စစ်ခေါင်းဆောင်နှင့်ရင်းနှီးသူဖြစ်သည်။
မြန်မာပြည်ငြိမ်းချမ်းရေးနှင့် အပစ်အခတ်ရပ်စဲရေးကို လိုလားသည်ဆိုသော ဆာဆာကာဝါသည် ပြည်သူလူထုထောက်ခံမှုရရှိထားပြီး ရွေးကောက်ခံများဖြင့် ဖွဲ့စည်းထားသော NUG အစိုးရနှင့်မူ ထိတွေ့ဆက်ဆံဆွေးနွေးခြင်း မရှိပေ။