ထန်တလန်မြို့တွင်းတိုက်ပွဲဖြစ်ပွားပြီးအကြမ်းဖက်စစ်ကောင်စီတပ် ၆ ဦးသေဆုံးပြီးနောက် စစ်တပ်ကမီးမလောင်သေးသည့်နေအိမ်များကို မီးရှို့ခဲ့ကြောင်းချင်းပြည်ကာကွယ်ရေးတပ်(CDF-ထန်တလန်)ကသတင်းထုတ်ပြန်သည်။
အကြမ်းဖက်စစ်ကောင်စီတပ်သည် မေ ၂၃ ရက်က ထန်တလန်မြို့ အမှတ် ၁ ရက်ကွက်ကို ထိုးစစ်ဆင်လာခြင်းကြောင့် CDF(ထန်တလန်) နှင့် ၈နာရီကြာ မြို့တွင်းတိုက်ပွဲဖြစ်ပွားခဲ့ခြင်းဖြစ်သည်ဟု ထုတ်ပြန်ချက်တွင်ဖော်ပြထားသည်။
မေ ၂၃ ရက် မနက် ၆နာရီမှ နေ့လယ် ၂နာရီအထိ တိုက်ပွဲပြင်းထန်စွာဖြစ်ပွားပြီး စစ်ကောင်စီတပ်မှာ ၆ဦး သေဆုံးကာ ၈ ဦးဒဏ်ရာရရှိခဲ့သည်ဟုCDFကထုတ်ပြန်ထားသည်။ CDF (ထန်တလန်) ဘက်မှ ရဲဘော် ၄ ဦး အလွန်မပြင်းထန်သည့် ဒဏ်ရာရရှိခဲ့သည်ဟုလည်းပါရှိသည်။
စစ်ကောင်စီတပ်များသည် အမှတ် (၁ )ရက်ကွက်အတွင်း အိမ်တိုင်းနီးပါးကို မီးရှို့ဖျက်ဆီးခဲ့ပြီး နေအိမ်အများစု မီးလောင်ပြာကျခဲ့သည်ဟုလည်း CDF(ထန်တလန်)က ဆိုထားသည်။ မီးလောင်သော အရေအတွက်ကို စာရင်းမကောက်နိုင်သေးကြောင်းလည်းသိရသည်။
Public Service Announcement
စစ်ကောင်စီတပ်က မေ ၂၃ ရက်ကတည်းက မီးရှို့ခဲ့ပြီး မေ ၂၄ ရက်အထိ မီးတောက်နှင့် မီးခိုးများကိုအဝေးမှလှမ်းမြင်နေရသည်ဟု ဒေသခံများကပြောသည်။
“ဒီတခါတော့ ကျွန်မတို့ အိမ်လေးပါသွားတာသေချာပြီ။ အိမ်မီးလောင်တာကြည့်ပြီး ဒီထပ်ပိုပြီး ဆုံးရှုံးစရာဘာမှ မရှိတော့ဘူးခံစားရတယ်။ ”ဟု ထန်တလန်မြို့ခံတဦးကပြောသည်။
စစ်ကောင်စီတပ်က အမြောက်များနှင့်ပစ်ခတ်ပြီး မီးရှို့ဖျက်ဆီးခြင်းဖြစ်သည်ဟု ဒေသခံများကပြောသည်။
စစ်ကောင်စီတပ်က ထန်တလန်မြို့ကို မေ ၂၃ ရက်အထိ မီးရှို့ခဲ့သည်မှာ ၂၈ ကြိမ်ရှိပြီး စုစုပေါင်း နေအိမ်ပေါင်း ၁၀၀၀ကျော် မီးရှို့ဖျက်ဆီးခဲ့ပြီးဖြစ်သည်။
ထန်တလန်မြို့ကို စစ်ကောင်စီတပ်က အကြမ်းဖက်မီးရှို့ခဲ့ခြင်းကြောင့် မြို့ခံတစ်သောင်းကျော်သည် နီးစပ်ရာ ကျေးရွာများ၊ စစ်ဘေးရှောင်စခန်းများနှင့် အိန္ဒိယနိုင်ငံဘက်ခြမ်းကို တိမ်းရှောင်နေကြရသည်။
