စစ်ကောင်စီစစ်ရုံးချုပ် အခြေစိုက်တဲ့ နေပြည်တော်မှာ ပုဂ္ဂလိကကိုယ်ပိုင်ကျောင်း ၁၆ကျောင်းကို နိုင်ငံရေးကင်းရှင်းမှုမရှိဘူးဆိုတဲ့စွပ်စွဲချက်နဲ့ ပိတ်သိမ်းလိုက်တယ်လို့သိရပါတယ်။
လိုင်စင်သက်တမ်းတိုးဖို့ ရှိနေတဲ့ ကျောင်း ၇ ကျောင်းနဲ့ သက်တမ်းကျန်ရှိနေတဲ့ ကျောင်း ၉ ကျောင်း စုစုပေါင်း ပုဂ္ဂလိကကျောင်း ၁၆ ကျောင်းကိုစစ်အုပ်စုက ပိတ်သိမ်းလိုက်တာပါ။
ဒီလိုပိတ်သိမ်းနိုင်ဖို့ စစ်ကောင်စီကအကြောင်းပြ တဲ့ နိုင်ငံရေးကင်းရှင်းမှုမရှိဘူးဆိုတဲ့အချက်ဟာ NLDပါတီနဲ့ဆက်နွယ်တဲ့အတွက် ဖြစ်နိုင်တယ်လို့ နေပြည်တော်က သတင်းရင်းမြစ်အချို့ဆီကသိရပါတယ်။
ပိတ်သိမ်းခံရတဲ့ အထဲ ပျဉ်းမနား ၊တပ်ကုန်း ၊ ဇမ္ဗူသီရိ၊ဥတ္တရသီရိမြို့နယ်တွေမှာရှိတဲ့ ကိုယ်ပိုင်ကျောင်းတွေပါဝင်ကြပါတယ်။
Public Service Announcement
ဒါအပြင် ပိတ်သိမ်းခံရတဲ့ ကျောင်းတွေမှာ နာမည်ကြီး ပုဂ္ဂလိကကျောင်းတွေ လည်းပါတယ်လို့ နေပြည်တော် ဒေသခံတွေဆီကသိရပါတယ်။
စစ်ကောင်စီက ဖွင့်လှစ်တဲ့ အခြေခံပညာကျောင်းတွေမှာ မထားရှိချင်တဲ့ မိဘတွေအတွက် အခုလို ပုဂ္ဂလိကကျောင်းတွေ ပိတ်သိမ်းခံရလိုက်ရတာဟာ အခက်အခဲဖြစ်စေတယ်လို့ နေပြည်တော်မှာ ၁၀ စု နှစ်တစ်ခုနီးပါး နေထိုင်နေတဲ့ ကျောင်းသား မိဘတစ်ဦးက ပြောပါတယ်။
အာဏာသိမ်းစစ်ကောင်စီရဲ့ ဆောင်ရွက်ချက်တွေကို ဝါဒဖြန့်နေကြတဲ့ဖေ့ဘွတ်ခ်အကောင့်တွေမှာတော့ စစ်ကောင်စီက ဖွင့်တဲ့ အခြေခံပညာကျောင်းတွေမှာ ကျောင်းသား၊ကျောင်းသူတွေများပြားလာဖို့အတွက် ပုဂ္ဂလိကကျောင်းတွေကို စိစစ်ပိတ်ပစ်တာတွေလုပ်ဖို့ ဆော်သြနေတာတွေ့ရပါတယ်။
