▪️ကျောက်ကြီးနယ်တွင်လည်း ကိုယ်ထူကိုယ်ထ ကျောင်းများဖွင့်၊ ဒေသအချို့တွင် စစ်ကောင်စီ၏ ကျောင်းဖွင့်ရန် ဖိအားပေး ခြိမ်းခြောက်မှုရှိ
ကရင်အမျိုးသားအစည်းအရုံး(KNU/KNLA) တပ်မဟာ (၃)နယ်မြေ ညောင်လေးပင်ခရိုင် မုန်းမြို့နယ်ရှိ ကျေးရွာပေါင်း ၁၃ရွာမှ ပြည်သူ့အုပ်ချုပ်ရေး ထူထောင်ရန် နှင့် မိမိကံကြမ္မာ မိမိဖန်တီးရေးအတွက် ကိုယ်ထူကိုယ်ထကျောင်း စတင်ဖွင့်လှစ်ခဲ့ကြောင်း KNUက ယနေ့ သတင်းထုတ်ပြန်သည်။
မုန်းမြို့နယ်ရှိ ကျေးရွာ(၁၃)ရွာမှ ကိုယ်ထူကိုယ်ထကျောင်းများကို ယနေ့ဇွန်လ(၇)ရက်နေ့မှ စ၍စတင်ဖွင့်လှစ်ခဲ့ခြင်းဖြစ်သည်။
ဒေသတွင်း၌ ကိုယ်ထူကိုယ်ထကျောင်းကို ပထမဦးဆုံးအနေဖြင့် စတင်ဖွင့်လှစ်သောကြောင့် ကျောင်းသုံးပစ္စည်းကိရိယာများ၊ ကျောင်းအဆောက်အဦးများ၊ ကျောင်း ဆရာ/ဆရာမများ စာရေးခုံ၊ ထိုင်ခုံ စသည့် လိုအပ်ချက်များ ရှိနေပြီး အခက်အခဲများစွာရှိနေကြောင်း ဒေသတာဝန်ရှိသူက ပြောကြားကြောင်း ဖော်ပြထားသည်။
Public Service Announcement
KNU ညောင်လေးပင်ခရိုင် ကျောက်ကြီးမြို့နယ်တွင်လည်း ကိုယ်ထူကိုယ်ထ ကျောင်းများကို ဇွန်လ ၂ရက်က စတင်ဖွင့်လှစ်ခဲ့သည်။ပြည်သူလူထုတည်ထောင်သည့် ကိုယ်ထူကိုယ်ထကျောင်းများဖြစ်သော လော်မူပယ်ကျေးရွာရှိ မူလတန်းကျောင်း၊ လော်မူသောကျေးရွာရှိ အလယ်တန်းကျောင်းနှင့် ကော်သာစေးကျေးရွာရှိ အလယ်တန်းကျောင်းများကို ဖွင့်လှစ်နိုင်ခဲ့သော်လည်း ကျောင်းသုံးပစ္စည်းကိရိယာများ၊ စာရေးခုံနှင့် ထိုင်ခုံများ အလုံအလောက်မရှိသေးဟု ဆိုသည်။
အာဏာရှင်၏ ပညာရေးစနစ်ကို မနှစ်သက်သော ကျွဲခြံကျေးရွာရှိ ပြည်သူလူထုများသည်လည်းကိုယ်ထူ ကိုယ်ထ ကျောင်း တည်ဆောက်ရန် ကြိုးပမ်းခဲ့ရာ အာဏာသိမ်း စစ်ကောင်စီတပ်၏ ခြိမ်းခြောက်ခြင်း ခံရကြောင်း အသိပေးထားသည်။
ဇွန်လ ၂ရက် နံနက်က အာဏာသိမ်းစစ်ကောင်စီတပ်၏ ခလရ-၆၀ မှ ဗိုလ်ကြီးအဆင့်ရှိသူဇေယျာလင်းမှ ကျွဲခြံကျေးရွာအုပ်စု ကျွဲခြံကျေးရွာရှိ စောမော်ဒေါင်းအား ခေါ်ယူတွေ့ဆုံပြီး အာဏာသိမ်းစစ်ကောင်စီ၏ စာသင် ကျောင်းကို ဖွင့်လှစ်ရန်ပြောဆိုကာ အကယ်၍ မဖွင့်ပါက ၊ မတက်ရောက်ပါက ကျွဲခြံကျေးရွာရှိ ကျေးရွာသူ/ရွာသားများကို မောင်းထုတ်ပြီး ကျေးရွာကို မီးရှို့ဖျက်ဆီးမည်ဟု ခြိမ်းခြောက်ခဲ့သည်ဟု KNUက ထုတ်ပြန်ထားသည်။
