ကုလသမဂ္ဂလူ့အခွင့်အရေးကောင်စီအဖွဲ့ဝင်သစ်ဖြစ်လာသည့် ချက်ပြည်သူ့သမ္မတနိုင်ငံကို မ ကြာမီကျင်းပမည့် ဂျီနီဗာညီလာခံ၌ မြန်မာ့အရေးအလေးထားလုပ်ဆောင်ရန် NUG လူ့အခွင့် အရေးဆိုင်ရာဝန်ကြီးက တိုက်တွန်းတင်ပြသည်။
အမျိုးသားညီညွတ်ရေးအစိုးရ လူ့အခွင့်အရေးဆိုင်ရာဝန်ကြီး ဦးအောင်မျိုးမင်းသည် ချက်နိုင်ငံခြားရေးဒုတိယဝန်ကြီး Jiri Kozak ကို ဇွန်လ ၉ရက်တွင် နိုင်ငံခြားရေးရုံးသို့ သွားရောက်တွေ့ဆုံပြီး မြန်မာနိုင်ငံအတွင်း တစ်နေ့တခြားဆိုးရွားလာသော လူ့အခွင့်အရေးချိုးဖောက်မှုများကို ရှင်းလင်းတင်ပြခဲ့ကြောင်း သတင်းထုတ်ပြန်သည်။
“ချက်ပြည်သူ့သမ္မတနိုင်ငံဟာ ဒီမိုကရေစီအရေးနှင့် ပတ်သတ်ပြီး တက်တက်ကြွကြွ ကြိုးပမ်းဆောင်ရွက်နေတဲ့နိုင်ငံဖြစ်တဲ့အတွက် လူ့အခွင့်အရေးကောင်စီမှာအဖွဲ့ဝင်နိုင်ငံဖြစ်လာခြင်းကအရေးပါလှပါတယ်” ဟု ဝန်ကြီးဦးအောင်မျိုးမင်းက ၎င်း၏ လူမှုကွန်ရက်၌ ရေးသားသည်။
ကုလလူ့အခွင့်အရေးကောင်စီတွင် ရုရှားကို ကောင်စီအဖွဲ့ဝင်အဖြစ်မှ ဆိုင်းငံ့ခဲ့ပြီးနောက် ချက်ပြည်သူ့သမ္မတနိုင်ငံသည် အဖွဲ့ဝင်အသစ်ဖြစ်လာခဲ့သည်။
Public Service Announcement
ချက်နိုင်ငံခြားရေးဒုတိယဝန်ကြီးက ၎င်းတို့နိုင်ငံ၏ နိုင်ငံခြားရေး မူဝါဒအရ မြန်မာ့အရေးကို ဦးစားပေးစာရင်းတွင် ထားရှိ၍ မြန်မာနိုင်ငံကို အမြန်ဆုံး ဒီမိုကရေစီနှင့် လူ့အခွင့်ရေးကိစ္စများဆိုင်ရာ ရ လာဒ်ကောင်းများဖြစ်ထွန်းစေရန် အားတက်သရော ဆောင်ရွက်သွားမည်ဟု ပြောကြားသည်။
ထို့အပြင် မြန်မာစစ်တပ်၏ လူ့အခွင့်အရေး ချိုးဖောက်မှုများအပေါ် တာဝန်ခံမှုရှိစေရေး၊ စစ်ရာဇဝတ်မှုအပါအဝင် လူ့အခွင့်အရေးချိုးဖောက်မှု ကျူးလွန်ခြင်းများအတွက် နိုင်ငံတကာ ဥပဒေများကို လေးစားလိုက်နာစေရေးအပါအဝင် လတ်တလော မြန်မာနိုင်ငံတွင်း ဖြစ်ပေါ်နေသော စိုးရိမ်ဖွယ်ရာ လူ့အခွင့်အရေးချိုးဖောက်မှုများကိစ္စများကို ချက်နိုင်ငံခြားရေးဒုတိယဝန်ကြီးက ထည့်သွင်းဆွေးနွေးခဲ့သည်ဟု NUG လူ့အခွင့်အရေးဆိုင်ရာဝန်ကြီးဌာနက ထုတ်ပြန်သည်။
ယင်းနောက် ကိုဂျင်မီ၊ ကိုဖြိုးဇေယျသော်နှင့် ဒီမိုကရေစီတတ်ကြွလှုပ်ရှားသူအချို့ကို အကြမ်းဖက်စစ်ကောင်စီက သေဒဏ်ပေးစီရင်ရန် လုပ်ဆောင်နေခြင်း၊ စစ်ကိုင်းတိုင်းအပါအဝင် မြန်မာနိုင်ငံတဝှမ်းရှိ အရပ်သားပြည်သူများကို ရက်စက်စွာသတ်ဖြတ်နေခြင်းများ၊ နေအိမ်အမြောက်အများမီးရှို့ဖျက်စီးမှုနှင့်ပတ်သတ်သော မြေပြင်သတင်းများကို NUG လူ့အခွင့်အရေးဝန်ကြီးက တင်ပြ ဆွေးနွေးနိုင်ခဲ့သည်ဟု ထုတ်ပြန်သည်။
