ရှမ်းပြည်နယ်မြောက်ပိုင်း သိန္နီခရိုင်အတွင်း၌ စစ်ကောင်စီတပ်ကို ကိုးကန့်တပ်မတော်(MNDAA)က ကြားဖြတ်တိုက်ခိုက်ခဲ့ရာ စစ်ကောင်စီတပ်မှ ၄ဦးသေဆုံးခဲ့ကြောင်း MNDAAက သတင်းထုတ်ပြန်သည်။
ဇွန်လ ၁၂ရက် မွန်းလွဲ ၁နာရီခွဲကျော်အချိန်တွင် တိုက်ပွဲစတင်ခဲ့ပြီး ၂နာရီကျော်ကြာ တိုက်ပွဲဖြစ်ခဲ့သည်ဟု ဆိုသည်။
“ကျွန်တော်တို့ တပ်မဟာ(၂၁၁)က စစ်ကောင်စီကို ကြားဖြတ်တိုက်ခိုက်တာ။ သိန္နီခရိုင် ကာမိုင်းဒေသထဲက ရွာတစ်ရွာရဲ့အနောက်ဘက်မှာ စစ်ကောင်စီချီတက်လာတယ်ဆိုပြီး သတင်းရတယ်။ ရထားတော့ စစ်ကောင်စီကို ကြားဖြတ်တိုက်ခိုက်တာ” ဟု MNDAA တပ်ဖွဲ့ဝင်တစ်ဦးက ပြောသည်။
တိုက်ပွဲအတွင်း MNDAA တပ်ဘက်က ထိခိုက်ကျဆုံး ဒဏ်ရာရမှုမရှိကြောင်း ၎င်းကဆက်ပြောသည်။
MNDAAနှင့် စစ်ကောင်စီတပ်တို့သည် မုံးကိုးခရိုင်နှင့် သိန္နီခရိုင် ဒေသများ၌ တိုက်ပွဲများ ပြန်လည်ဖြစ်ပွားလျက်ရှိသည်။