▪️PDFများနှင့်တိုက်ပွဲအတွင်း စစ်ကောင်စီတပ်သား ၁၅ဦးသေဟုဆို
စစ်ကိုင်းတိုင်း၊ ရွှေဘိုမြို့နယ်တွင် အကြမ်းဖက်စစ်ကောင်စီတပ်က ဒေသခံပြည်သူသုံးဦးကို မီးရှို့သတ် ဖြတ်ခဲ့ပြီး ဒေသတွင်းPDFများနှင့် တိုက်ပွဲဖြစ်ပွားခဲ့ရာ စစ်အုပ်စုဘက်မှ ၁၅ဦးသေဆုံးခဲ့ကြောင်း ဗိုလ်ကျားရိုင်း-ရွှေဘို(LPDF)အဖွဲ့က သတင်းထုတ်ပြန်သည်။
ယမန်နေ့(ဇွန်လ၂၄ရက်) နံနက် ၄နာရီခွဲခန့်က ရွှေဘိုမြို့ ခမရ(၄၂)မှ အင်အား ၄၀ကျော်ပါသော အကြမ်းဖက်စစ်ကောင်စီတပ်သားများသည် ရွှေဘိုမြို့နယ် ဆိပ်ခွန်ကျေးရွာရှိ အထိုင်ချတပ်စွဲထားသော အခြားစစ်ကောင်စီအဖွဲ့နှင့်ပူးပေါင်းကာ ဆိပ်ခွန်ကျေးရွာအနောက်ဘက်ရှိ စောင်တန်းရွာ၊ ထူးကြီးရွာနှင့် တည်ပင်ကျေးရွာများသို့ လက်နက်ကြီး၊လက်နက်ငယ် အပြည့်အစုံဖြင့် စစ်ကြောင်းထိုးလာခဲ့သည်။
စောင်တန်းရွာရှိ နေအိမ် တစ်လုံးနှင့် ပုဏ္ဏားကုန်းရွာရှိ နေအိမ် (၇)လုံးကို မီးရှို့ဖျက်ဆီးခဲ့ပြီး စောင်တန်းကျေးရွာနေ အရပ်သားပြည်သူ သုံးဦးအား အရှင် လတ်လတ်မီးရှို့သတ်ဖြတ်ခဲ့ကြောင်း ဗိုလ်ကျားရိုင်း- ရွှေဘို(LPDF)အဖွဲ့၏ ထုတ်ပြန်ချက်တွင် ဖော်ပြ သည်။
ထူးကြီးကျေးရွာထိပ်တွင် ဆိပ်ခွန်တိုက်နယ်(၂) ကာကွယ်ရေးအဖွဲ့များနှင့် ပထမတစ်ကြိမ်ထိတွေ့ တိုက်ပွဲဖြစ်ပွားခဲ့ပြီး အကြမ်းဖက်စစ်ကောင်စီဘက်မှ သုံးဦးသေဆုံးခဲ့ကြောင်း၊ ပြည်သူ့ကာကွယ်ရေးရဲဘော်များ အထိအခိုက်မရှိပြန်လည်ဆုတ်ခွာနိုင်ခဲ့ကြောင်း ဗိုလ်ကျားရိုင်းအဖွဲ့က အသိပေးသည်။
Public Service Announcement
ထို့အပြင် နံနက် ၁၁နာရီဝန်းကျင်တွင် ထူးကြီးရွာနှင့် တည်ပင်ကျေးရွာအကြား၌ ထပ်မံထိတွေ့တိုက်ပွဲဖြစ်ပွားခဲ့ရာ အကြမ်းဖက်စစ်ကောင်စီဘက်မှ ၁၂ဦးသေဆုံးပြီး (၇)ဦး ဒဏ်ရာရရှိခဲ့ပြီး ကာကွယ်ရေးအဖွဲ့များဘက်မှ ရဲဘော် တစ်ဦးကျဆုံးပြီး တစ်ဦး (အပြင်းအထန်)ဒဏ်ရာရှိခဲ့ကြောင်း ထပ်မံထုတ်ပြန်ထားသည်။
ဗိုလ်ကျားရိုင်း -ရွှေဘို(LDF),C&T SHWEBO (LDF)၊ SNAKE EYES (LDF), ALPHA-7 (LDF)၊ဒေါင်းမာန် (LDF)၊ PLA (Z2)၊ အရာတော် ရွှေဂျိုးဖြူ ၊ FLYING DRAGON FORCE (LDF) ၊ MDF – SHWEBO၊ မဟူရာပြောက်ကြား (ဒီပဲယင်း) ၊မတစ်ထောင်(တစ်ကောင်ဖွား) ဒီပဲယင်း၊ ရွှေဘိုခရိုင် တပ်ရင်း(၅) – တပ်ခွဲ (၃) (Federal Army) နှင့် ဆိပ်ခွန်တိုက်နယ်(၂) မှ ဒေသခံကာကွယ်ရေးအဖွဲ့အစည်းများ၏ အပြင်းအထန်ခုခံမှုများ နှင့် တန်ပြန်တိုက်စစ်များကြောင့် ယနေ့ (ဇွန်လ၂၅ရက်)နံနက် ၆နာရီခွဲခန့်တွင် အကြမ်းဖက်စစ်ကောင်စီတပ်များသည် လာရာလမ်းအတိုင်း နောက်ကြောင်းပြန်ဆုတ်ခွာသွားကြောင်း ဗိုလ်ကျားရိုင်း -ရွှေဘို(LPDF)အဖွဲ့က အသိပေးသည်။
