လန်ချန်း-မဲခေါင် ပူးပေါင်းဆောင်ရွက်ရေး နိုင်ငံခြားရေး၀န်ကြီးအစည်းအဝေး ကျင်းပရန် ကြိုးပမ်းမှုသည် မြန်မာပြည်သူများ၏ ဆန္ဒကို ချိုးဖောက်ကျူးလွန်ခြင်းဖြစ်ကြောင်း NUG နိုင်ငံခြား ရေးဝန်ကြီးဌာနက ယနေ့ထုတ်ပြန်သည်။
အကြမ်းဖက်စစ်ကောင်စီက လန်ချန်း-မဲခေါင်ပူးပေါင်းဆောင်ရွက်ရေး နိုင်ငံခြားရေးဝန်ကြီး အစည်းအဝေးကို ပုဂံမြို့၌ လက်ခံကျင်းပရန်စီစဉ်နေပြီး ယင်းအစည်းအဝေးသည် မြန်မာလူမှု အသိုက်အဝန်းတည်ဆောက်ရေးကို နှောင့်ယှက်ဖျက်ဆီးရာရောက်ကြောင်း NUG ၏ ထုတ်ပြန်ချက်၌ ဖော်ပြသည်။
လန်ချန်း-မဲခေါင် ပူးပေါင်းဆောင်ရွက်ရေးနိုင်ငံခြားရေးဝန်ကြီးများ အစည်းအဝေးကို မြန်မာ နိုင်ငံ၌ ကျင်းပရန် ဆောင်ရွက်ခြင်းသည် အာဆီယံ၏ ဆုံးဖြတ်ချက်နှင့် တိုက်ရိုက်ဆန့်ကျင်ပြီး အာဆီယံ၏ အသိုက်အဝန်း တည်ဆောက်ရေး ကြိုးပမ်းမှုများကို ကြီးမားသော ခြိမ်းခြောက်မှုတစ်ရပ် ဖြစ်စေကြောင်း NUG က ဆိုသည်။
တရုတ်၊ ကမ္ဘောဒီးယား၊ ထိုင်း၊ မြန်မာ၊ လာအို၊ ဗီယက်နမ် ၆ နိုင်ငံပါဝင်သော အဆိုပါ လန်ချန်း-မဲ ခေါင်ပူးပေါင်းဆောင်ရွက်ရေး(LMC)နိုင်ငံခြားရေးဝန်ကြီးများအစည်းအဝေးသည် ပထမအကြိမ် ထိပ်သီးခေါင်းဆောင်များအစည်းအဝေးက ချမှတ်ခဲ့သော ဆန်နျာကြေညာချက် (Sanya Declaration) အပေါ် ရပ်တည်သင့်ကြောင်း NUG နိုင်ငံခြားရေးဝန်ကြီးဌာနက အကြံပြုသည်။
Public Service Announcement
အကြမ်းဖက်စစ်အုပ်စုသည် မြန်မာနိုင်ငံတွင် ငြိမ်းချမ်းရေး သို့မဟုတ် ရေရှည်တည်တံ့ခိုင်မြဲသော ဖွံ့ဖြိုးတိုးတက်ရေးကို စိတ်ပါဝင်စားခြင်းမရှိသည့် ရာဇ၀တ်မှုကျူးလွန်သည့် အဖွဲ့အစည်းဖြစ်ပြီး တရားဝင်အစိုးရအဖြစ် မည်သို့မျှမယူဆနိုင်သဖြင့် လန်ချန်း-မဲခေါင်ပူးပေါင်းဆောင်ရွက်ရေး ဖိုရမ်တွင် ၎င်း၏ ပါဝင်ပတ်သက်မှုအားလုံးကို တားမြစ်ထားသင့်ကြောင်း အမြဲတမ်းပူးတွဲဥက္ကဌ တရုတ်ကို NUGက တိုက်တွန်းသည်။
ထို့အပြင် တရုတ်ကုမ္ပဏီနယ်မြေများနှင့် စီမံကိန်းနေရာများတွင် အကြမ်းဖက်စစ်အုပ်စုက ၎င်း၏ တပ်သားများချထားခြင်းဖြင့် နိုင်ငံအတွင်း တရုတ်ရင်းနှီးမြှုပ်နှံမှုများနှင့် ပိုင်ဆိုင်မှုများကို လက်နက်အဖြစ် အသုံးချရန်စတင်နေပြီကို အမျိုးသားညီညွတ်ရေးအစိုးရမှ ပြင်းပြင်းထန်ထန် စိုးရိမ်ကြောင်း ဖော်ပြသည်။
