ရန်ကုန်မြို့ လှည်းတန်း ပေ(၅၀)လမ်းစျေးတွင် ယနေ့နံနက် ၉နာရီခန့်က အမျိုးသမီးနှစ်ဦး သေနတ်ဖြင့်ပစ်ခံရပြီး တစ်ဦးသေဆုံးကာ ကျန်တစ်ဦးမှာ ဒဏ်ရာအပြင်းအထန်ရရှိခဲ့ကြောင်း လှည်းတန်းနေပြည်သူများက ပြောသည်။
သေနတ်ဖြင့်ပစ်ခံရသည့် အမျိုးသမီးနှစ်ဦးမှာ လှည်းတန်း(၁)လမ်းနေ အသက် ၅၀ခန့်အရွယ်ညီအစ်မနှစ်ဦးဖြစ်ကြောင်း ၎င်းတို့က ဆိုသည်။
မျက်မြင်တွေ့ရှိသူတစ်ဦး၏ပြောဆိုမှုအရ အပစ်ခံရသည့်အမျိုးသမီးနှစ်ဦးအနက် အကြီးဖြစ်သူမှာနေရာတင် ပွဲချင်းပြီးသေဆုံးကာ အငယ်ဖြစ်သူမှာ ဆေးရုံသို့ပို့လိုက်ကြောင်း ပြောသည်။
“ဒလန်ညီအစ်မပါ။ အဲ့ဒီထိပ်မှာ မာလကာသီးတို့ သရက်သီးတို့ရောင်းတဲ့သူပါ။ အစ်မက ပွဲချင်းပြီးသေပါတယ်။ အငယ်မက မသေသေးလို့ ဆေးရုံပို့လိုက်တယ်။ နားထင်ကိုထိထားတယ်လို့သိရပါတယ်”ဟု ၎င်းက ပြောသည်။
Public Service Announcement
၎င်းတို့ ညီအစ်မနှစ်ဦးသည် ပြည်ခိုင်ဖြိုးပါတီထောက်ခံသူနှစ်ဦးဖြစ်ပြီး ပြီးခဲ့သည့် လပိုင်းအတွင်းက မင်္ဂလာဒုံမြို့နယ်၌ စစ်ကောင်စီကပေးသည့် အခြေခံစစ်သင်တန်းသွားရောက်သင်ကြားခဲ့သူဖြစ်ကြောင်း လှည်းတန်းနေ ပြည်သူတစ်ဦးက ပြောသည်။
ဒလန်ရှင်းလင်းခြင်းဖြစ်ကြောင်း ပြောဆိုမှုများရှိသော်လည်း လူထုနွေဦးမှ သီးခြားအတည်ပြုနိုင်ခြင်းမရှိသေးပေ။
အခင်းဖြစ်ပွားသည့် လှည်းတန်း ပေ(၅၀)လမ်းစျေးသည် ပြီးခဲ့သည့်ရက်ပိုင်းကပင် စစ်ကောင်စီတပ်၏ ရမ်းကားဖျက်ဆီးပြီး မီးတင်ရှို့ခြင်းကို ခံထားရသည်။ စစ်ကောင်စီတပ်ဖွဲ့ဝင်များသည် စျေးသည်များ၏ စျေးဗန်းများ၊ စျေးဆိုင်ခုံများ၊ လှည်းများကို မီးရှို့ဖျက်ဆီးခဲ့ပြီး စျေးသည်များအား အော်ဟစ်ဆဲဆိုခဲ့သည်ဟုလည်း မျက်မြင်တွေ့ရှိသူများက ပြောဆိုသည်။
ရန်ကုန်မြို့လယ်၌ လက်နက်အားကိုးဖြင့် မီးရှို့ရမ်းကားခဲ့သည့် အကြမ်းဖက်စစ်ကောင်စီ ၏လုပ်ရပ်အပေါ် အပြင်းအထန်ရှုတ်ချကြောင်း စစ်အာဏာရှင်ဆန့်ကျင်ရေးရန်ကုန်အင်အားစု (AJAY)က ထုတ်ပြန်ထားသည်။
လက်ရှိတွင် စစ်ကောင်စီတပ်မှ DC နှစ်စီးရောက်ရှိနေပြီး စစ်ဆေးမေးမြန်းမှုများလုပ်ဆောင်နေကြောင်း သိရသည်။
