စစ်ကောင်စီတပ်လက်အောက်ခံ ကိုင်းတောမရဲစခန်းမှ ရဲတပ်သားနှစ်ဦး ပြည်သူနှင့်အတူပူးပေါင်း၍ လက်နက်နှင့်အတူ အလင်းဝင်ခိုလှုံလာကြောင်း မြိုင်(ပကဖ)က ယနေ့(ဇူလိုင် ၉)တွင် အသိပေးထုတ်ပြန်သည်။
အလင်းဝင်လာသော ရဲတပ်သားနှစ်ဦးမှာ ရဲတပ်သားပါဆန်း (လ ၂၆၁၇၃၁)နှင့် ရဲတပ်သား လူသော် (လ၂၈၄၄၈၈)တို့ဖြစ်ကြောင်း ဖော်ပြသည်။
“သူတို့က ချင်းပြည်က ကိုင်းတောမစခန်းမှာ တာဝန်ကျတာ ၄-၅ ရက်ပဲရှိသေးတယ်။ လက် နက်ပါတယ်။ အူဇီ ၂ လက်”ဟု မြိုင်(ပကဖ)မှ ရဲဘော်တစ်ဦးက ပြောသည်။
အဆိုပါရဲသားနှစ်ဦးသည် ယမန်နေ့(ဇူလိုင် ၈)နံနက် ၉ နာရီ ၄၅ ခန့်တွင် မြိုင်(ပကဖ)ထံရောက်ရှိလာခြင်းဖြစ်ပြီး ၎င်းတို့နှင့်အတူ BA 94 နှစ်လက်(ဒေသခေါ် အူစီ)၊ ကျည်အတောင့် ၉၀ ဖြင့် CDM ပြုလုပ်ခဲ့ခြင်းဖြစ် ကြောင်း ဖော်ပြသည်။
Public Service Announcement
ယင်းတပ်သားနှစ်ဦးအား မြိုင်(ပကဖ)မှ တစ်ဦးလျင် ကျပ်သိန်း ၅၀စီ ထောက်ပံ့ပေးအပ်ခဲ့ပြီး လွတ်မြောက်နယ်မြေသို့ ပို့ဆောင်ပေးထားရှိကြောင်း အသိပေးသည်။
ယခုလို ပြည်သူဘက်ပူးပေါင်းပြီး CDM ပြုလုပ်လာသော ရဲနှစ်ဦးမှာ တိုင်းရင်းသားများဖြစ်သောကြောင်း ၎င်းတို့အနေဖြင့် အတိုင်းမသိဝမ်းသာပြီး ညီရင်းအစ်ကိုပမာစောင့်ရှောက်၍ လွတ်မြောက်နယ်မြေသို့ ပို့ဆောင်ခဲ့ခြင်းဖြစ်သည်ဟု ဆိုသည်။
အကြမ်းဖက်စစ်ကောင်စီတပ်လက်အောက်မှ ပြည်သူ့ဘက်ပူးပေါင်းပြီး မြိုင်(ပကဖ)ထံခိုလှုံ ၍ CDM ပြုလုပ်လာသူ ကိုးဦးရှိပြီဖြစ်ပြီး ၎င်းတို့အနက် သုံးဦးမှာ လက်နက်နှင့်အတူ အလင်းဝင်လာခြင်းဖြစ်သည်။
