ချင်းတောင်ခြေအတိုင်း စစ်ကြောင်းထိုးလာသောအကြမ်းဖက်စစ်ကောင်စီတပ်အားကလေးမြို့အခြေစိုက်ပြည်သူ့ကာကွယ်ရေးမဟာမိတ်တပ်ဖွဲ့များယနေ့တိုက်ခိုက်နေရာ၊တိုက်ပွဲအပြင်းအထန်ဖြစ်နေကြောင်းဒေသခံများကပြောသည်။
ယောဒေသနှင့် ကလေးနယ်ထိစပ်နေသည့် ချင်းတောင်ခြေဝန်းကျင်တစ်ဝိုက်ဖြစ်သည့် ကလေးမြို့နယ်တောင်ပိုင်းတွင် တိုက်ပွဲဖြစ်နေခြင်းဖြစ်သည်။ထို့ကြောင့်ဒေသခံပြည်သူများကလေးမြို့တောင်ပိုင်းသို့ မလာကြရန် ပြည်သူ့ကာကွယ်ရေးရဲဘော်တစ်ဦးက သတိပေးသည်။
“ရှိပြီးသားလမ်းကနေ မလာရဲလို့ ချင်းတောင်ခြေတောလမ်းကနေ လာတဲ့ စစ်ကြောင်း။ ဟားခါးလေးရွာကိုလည်းဝင်မွှေနေတယ်” ဟု ဒေသခံတစ်ဦးကပြောသည်။
ဟားခါးလေးကျေးရွာနှင့် တစ်ဆက်တည်းဖြစ်သောရေစိုရွာမှ ပြည်သူ ၁၀ ဦးခန့်ကို ဓားစားခံအနေဖြင့် စစ်ကောင်စီတပ်က ဖမ်းဆီးထားသည်ဟု ယနေ့(ဇူလိုင်၁၁ရက်) နေ့လည် ၁၂ နာရီခန့်အခြေအနေကို စစ်ဘေးရှောင်တစ်ဦးကပြောသည်။
Public Service Announcement
အရေးကြီးအကြောင်းအရာမရှိဘဲ နေအိမ်ပြင်ပသို့ မထွက်ကြရန် ကလေးမြို့အခြေစိုက် ပြည်သူ့ကာကွယ်ရေးတပ်ဖွဲ့က သတိပေးချက် ထုတ်ပြန်ထားသည်။
အခြားသတင်းတစ်ရပ်တွင် ကလေးမြို့တွင် စစ်ကောင်စီကိုထောက်ခံပြီးစစ်ကောင်စီသတင်းပေးလည်းဖြစ်၊ PDF များကို ဂရုမစိုက်ဟု လူမှုကွန်ရက်မှတဆင့် ဆဲဆို စိန်ခေါ်ခဲ့သည့် မှုခင်းသတင်းထောက်စိန်လင်းနှင့် ဇနီးဖြစ်သူတို့ ယနေ့ အသတ်ခံလိုက်ရသည်။
စိန်လင်းနှင့် ဇနီးသည် ယနေ့(ဇူလိုင် ၁၁ရက်) နေ့လယ် ၁၂ နာရီခန့်က ကလေးမြို့ ရနံ့သစ်လက်ဖက်ရည်ဆိုင်၌ ထိုင်နေစဥ် သေနတ်ဖြင့် ပစ်သတ်ခံရခြင်းဖြစ်သည်ဟု ဒေသခံများကပြောသည်။မည်သည့်အဖွဲ့က ပစ်သတ်သွားသည်ကို မသိရသေးဟု ဒေသခံအချို့ကပြောသည်။
