ကေအဲန်ယူ-လယ်ဒို(ကျောက်ကြီး)မြို့နယ်အတွင်းမှာ စစ်ကောင်စီတပ်နဲ့ KNLA တပ်မဟာ ၃ တို့အကြား တိုက်ပွဲဆက်လက်ဖြစ်ပွားခဲ့ပြီး စစ်ကောင်စီတပ်ရဲ့လက်ချက်ကြောင့် ဒေသခံနှစ်ဦးသေဆုံးပြီး လပိုင်းအရွယ်ကလေးငယ်တစ်ဦးအပါအဝင် ကလေးနှစ်ဦး ထိခိုက်ဒဏ်ရာရရှိသွားခဲ့တယ်လို့ ကေအဲန်ယူက သတင်းထုတ်ပြန်ထားပါတယ်။
ကေအဲန်ယူ-ကရင်အမျိုးသားအစည်းအရုံး ခလယ်လွီထူ(ညောင်လေးပင်)ခရိုင် လယ်ဒိုမြို့နယ်အတွင်းမှာ ဇူလိုင်(၁၄)ရက် မွန်းလွဲပိုင်းက စစ်ကောင်စီရဲ့ ခမရ(၃၅၁)၊ ခလရ(၆၀) ပူးပေါင်းတပ်တွေဟာ မာလာဦးဂိတ်နဲ့ ဆင်မတောင်ကနေ စပ်လဲကျေးရွာထဲကို လက်နက်ကြီးပစ်ခတ်ခဲ့တယ်လို့ ထုတ်ပြန်ချက်မှာပါရှိပါတယ်။
အဲ့ဒီလို စစ်ကောင်စီရဲ့ လက်နက်ကြီးပစ်ခတ်မှုကြောင့် စပ်လဲကျေးရွာရှိ အသက်(၄၀)အရွယ်ရှိတဲ့ အမျိုးသားတစ်ဦး ထိမှန်သေဆုံးခဲ့ပြီး အသက်(၁၂)နှစ်နဲ့ အသက်(၅)လအရွယ်ရှိတဲ့ ကလေးငယ်နှစ်ဦး ထိခိုက်ဒဏ်ရာရရှိခဲ့ကာ နေအိမ်နှစ်လုံးလည်း ထိခိုက်ပျက်စီးသွားခဲ့တယ်လို့ ထုတ်ပြန်ချက်မှာဖော်ပြထားပါတယ်။
ဒါ့အပြင် ဇူလိုင်(၁၄)ရက်နေ့ မနက် ၇ နာရီအချိန်က စစ်ကောင်စီတပ်က သောင်ပုကျေးရွာရှိ သင်းအုပ်ဆရာတစ်ဦးရဲ့ သားဖြစ်သူ အသက်(၂၇)အရွယ်ရှိတဲ့ လူငယ်အမျိုးသားတစ်ဦးကို စစ်ကောင်စီတပ်က ဖမ်းဆီးသတ်ဖြတ်ခဲ့တယ်လို့ ကေအဲန်ယူက ပြောပါတယ်။
Public Service Announcement
အဲ့ဒီနောက် မနက် ၈ နာရီကျော်အချိန်မှာ ကျောက်စရစ်ကျေးရွာအုပ်စု သောင်ပုကျေးရွာအနီးမှာ စစ်ကောင်စီရဲ့ ခမရ(၃၅၀)၊ ခမရ(၆၀၃)နဲ့ ကရင်အမျိုးသားလွတ်မြောက်ရေးတပ်မတော်(KNLA) တပ်ရင်း(၉)တို့အကြား ထိပ်တိုက်တိုက်ပွဲဖြစ်ပွားခဲ့ပြီး KNLA ဘက်က ထိခိုက်မှုမရှိပေမယ့် စစ်ကောင်စီဘက်က ထိခိုက်မှုကို အတည်ပြုလို့မရသေးဘူးလို့ ကေအဲန်ယူက ဆိုပါတယ်။
ဒါ့အပြင် နေ့လည် ၁၂ နာရီကျော်အချိန်မှာ စစ်ကောင်စီတပ်က ဇူလိုင်(၁၃)ရက်နေ့က ဖမ်းဆီးထားတဲ့ လယ်ဒိုမြို့နယ် အလယ်စုကျေးရွာနဲ့ ဝါးပင်စုကျေးရွာက ဒေသခံပြည်သူလူထုကို ဓားစာခံအဖြစ်ခေါ်ယူပြီး ကျောက်စရစ်စခန်းဘက်ကို ပြန်ဝင်သွားခဲ့တယ်လို့ ထုတ်ပြန်ချက်အရ သိရပါတယ်။
ကေအဲန်ယူ-လယ်ဒိုမြို့နယ် မူသယ်ကျေးရွာအနီးမှာလည်း စစ်ကောင်စီရဲ့ ခလရ(၇၅)တပ်နဲ့ ကရင့်အမျိုးသားကာကွယ်ရေးတပ်မတော်(KNDO) တို့အကြား ထိပ်တိုက် တိုက်ပွဲဖြစ်ပွားခဲ့ပြီး စစ်ကောင်စီဘက်က တပ်ကြပ်ကြီးအဆင့်ရှိသူတစ်ဦး သေဆုံးသွားခဲ့တယ်လို့ ကေအဲန်ယူရဲဲ့ ထုတ်ပြန်ထားချက်အရ သိရပါတယ်။
