လှိုင်မြို့နယ်တွင် စစ်ကောင်စီတပ် ဗိုလ်ကြီးနှင့်ဇနီး ပစ်ခတ်ရှင်းလင်းမှုမှာ “နန်းထိုက်အောင်”စစ်ဆင်ရေးအရဟု တာဝန်ရှိသူပြော

ရန်ကုန်မြို့ လှိုင်မြို့နယ်တွင် စစ်ကောင်စီတပ်မှ ဗိုလ်ကြီးအောင်နိုင်ဖြိုးနှင့်၎င်း၏ ဇနီး ပစ်ခတ် ရှင်းလင်းမှုမှာ “နန်းထိုက်အောင်”စစ်ဆင်ရေးအရ ဆောင်ရွက်ခဲ့ခြင်းဖြစ်ကြောင်း ရန်ကုန်တိုင်းစစ်ဒေသခွဲကွပ်ကဲရေးအဖွဲ့တာဝန်ရှိ သူက People’s Spring သို့ ပြောကြားသည်။

” လှိုင်က ဗိုလ်ကြီးလင်မယားကို ရှင်းတဲ့ကိစ္စက ဟိုနေ့က ပြောသလိုပဲ ကိုင်းကြီးကြီးတွေ ဖြတ်ဖို့လုပ်ပြီးဆိုတဲ့ အကျိုးဆက်ပဲပေါ့နော်။ နန်းထိုက်အောင် အဖွဲ့က ဆောင်ရွက်တာပါ”ဟု ၎င်းကပြောသည်။

ယနေ့(ဇူလိုင် ၁၈ ရက်) နံနက် ၉ နာရီခွဲခန့်က လှိုင်မြို့နယ် ပိတောက်ချောင်း၊ (၂) ရပ်ကွက်၊ ဘုရင့်နောင် (၉) လမ်း၌ ပစ်သတ်ခံရခြင်း ဖြစ်သည်။

“သူတို့နေတာက ဘုရင့်နောင် (၄)လမ်းထဲမှာလို့ပြောတယ်။ ကားနဲ့ထွက်လာတဲ့ အချိန် ဘုရင့်နောင် (၉)လမ်းထဲမှာ ပစ်သတ်ခံရတာ”ဟု လှိုင်မြို့နယ်တွင် နေထိုင်သူတစ်ဦးက ရှင်းပြသည်။

Public Service Announcement

အကြမ်းဖက်စစ်ကောင်စီ၏ ဝါဒဖြန့်သတင်းပေ့ချ် များ၏ အဆိုအရ သေနတ်ဖြင့် ငါးချက်အနီးကပ်ပစ်ခတ်သဖြင့် ဗိုလ်ကြီးအောင်နိုင်ဖြိုးနှင့်မဂျူးဂျူးအောင် တို့တွင် လည်ပင်းနှင့်နားထင်ကျည်ထိမှန်ဒဏ်ရာများဖြင့်အခင်းဖြစ်နေရာတွင် သေဆုံးသွားကြောင်း ဖော်ပြသည်။

၂၀၂၂ ဧပြီ ၈ရက်က စတင်ခဲ့သော နန်းထိုက်အောင်မြို့ပြစစ်ဆင်ရေးအရ ရက်ပေါင်း ၆၀အတွင်း စစ်ကောင်စီပစ်မှတ် ၉၁ ခုအား တိုက်ခိုက်ခဲ့ပြီး အကြမ်းဖက်စစ်ကောင်စီတပ်ဘက်မှ ၈၀ ဦးထက်မနည်းသေဆုံးပြီး ၉၀ ကျော်ပြင်းထန်ဒဏ်ရာများရရှိကြောင်း စစ်ဆင်ရေးတာဝန်ခံက အသိပေးသည်။