စုစုပေါင်းရင်းနှီးမြှပ်နှံမှုတန်ဖိုးဒေါ်လာတစ်ဘီလီယံတန်ဖိုးရှိစင်ကာပူ နှင့်တရုတ် ရင်းနှီးမြှပ်နှံမှုလုပ်ငန်း ၈ခုကို ခြွင်းချက်မရှိရပ်ဆိုင်းထားရန်နောက်ဆုံးအကြိမ် သတိပေးလိုက်ကြောင်း အမျိုးသားညီညွတ်ရေးအစိုးရ (NUG)၊ စီမံကိန်း၊ ဘဏ္ဍာရေးနှင့် ရင်းနှီးမြှပ်နှံမှုဝန်ကြီးဌာနက ယနေ့ထုတ်ပြန်သည်။
တားမြစ်ချက်ကို မလိုက်နာပါက လက်တွေ့ကျကျ ပြင်းထန်စွာအရေးယူသွားမည်ဟုထုတ်ပြန်လျက်တွင်ဖော်ပြထားသည်။
အဆိုပါလုပ်ငန်း ၈ခုတွင် စင်ကာပူမှလုပ်ငန်း၇ခုနှင့် တရုတ်နိုင်ငံမှ လုပ်ငန်း တစ်ခုတို့ပါဝင်သည်။ စင်ကာပူလုပ်ငန်း ၇ခုတွင် နေရောင်ခြည်သုံး ဓာတ်အားပေးစက်ရုံ ၅ခုနှင့် SIM ကုမ္ပဏီ၏ ဒေါ်လာ ၃၇၆သန်းတန် ကမ်းလွန်ရေနံတူးဖော်ရေးလုပ်ငန်းများကို ထောက်ပံ့ပို့ဆောင်သည့်စီမံကိန်းတစ်ခုပါဝင်သည်။
စင်ကာပူနိုင်ငံမှနေရောင်ခြည်သုံးဓာတ်အားပေးစက်ရုံ၅ခုတွင် ရန်ကုန်မြို့၊ ဒလနှင့်ဆိပ်ကြီးခနောင်တိုတို့တွင်လုပ်ကိုင်မည်ဆိုသော Yangon Thermal Power ကုမ္ပဏီ၏ ဒေါ်လာ သန်း ၅၂၂ တန်စီမံကိန်းလည်းပါဝင်သည်။
တရုတ်လုပ်ငန်းမှာ ရွှေပြည်သာတွင်လုပ်ကိုင်မည့် ဒေါ်လာ ၂၉ သန်းတန် အထည်ချုပ်လုပ်ငန်းတစ်ခုဖြစ်သည်။
Public Service Announcement
စစ်ကောင်စီက နိုင်ငံတော်အာဏာကို လုယူခဲ့သည့် ဖေဖော်ဝါရီ ၁ ရက်မှ စတင်ပြီး ရင်းနှီးမြှပ်နှံမှုဆိုင်ရာ ခွင့်ပြုမိန့်များ/အတည်ပြုမိန့်များထုတ်ပေးခြင်းတို့ကို ရပ်ဆိုင်းထားပြီးဖြစ်သည်ဟု NUGကဆိုထားသည်။
စစ်ကောင်စီလက်အောက်ခံ အဖွဲ့အစည်းများက ခွင့်ပြုပေးသည့် ရင်းနှီးမြှပ်နှံအသစ်များကို NUGက အသိအမှတ်ပြုမည်မဟုတ်ကြောင်းလည်းဆိုထားသည်။ တားမြစ်ချက်များကို လိုက်နာခြင်းမရှိပါက ထိရောက်စွာအရေးယူမည်ဟု ၂၀၂၁ ဩဂုတ် ၃၀ ရက်တွင်လည်း သတိပေးစာထုတ်ထားပြီးဖြစ်သည်ဟုဆိုသည်။
