နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို မတရားသဖြင့် ထောင်ဒဏ် ၆ နှစ်ချမှတ်လိုက်ခြင်းကို ပြစ်တင်ရှုတ်ချကြောင်းနှင့် ချက်ချင်းပြန်လွှတ်ပေးရန် တောင်းဆိုကြောင်း ဥရောပသမဂ္ဂ နိုင်ငံခြားမူဝါဒအကြီးအကဲ Josep Borrell က ယမန်နေ့တွင် ပြောသည်။
အကြမ်းဖက်စစ်ကောင်စီလက်အောက်ခံတရားရုံးက ယမန်နေ့(ဩဂုတ် ၁၅ ရက်)တွင် အသက် ၇၇ နှစ်အရွယ် ဒေါ်အောင်ဆန်းစုကြည်ကို အဂတိလိုက်စားသည်ဆိုကာ ထောင်ဒဏ် ၆ နှစ် ထပ်မံချမှတ်ခဲ့ကာ လက်ရှိတွင် စုစုပေါင်း ထောင်ဒဏ် ၁၇ နှစ် ချမှတ်ခံထားရပြီးဖြစ်သည်။
“(ဒေါ်)အောင်ဆန်းစုကြည်ကို နောက်ထပ်ထောင်ဒဏ် ၆ နှစ် မတရားသဖြင့် စီရင်လိုက်တာကို ကျွန်တော်ပြစ်တင်ရှုတ်ချပါတယ်။ သူမကို ခြွင်းချက်မရှိ ချက်ချင်းပြန်လွှတ်ပေးဖို့ စစ်ကောင်စီကို တောင်းဆိုပါတယ်” ဟု အီးယူအကြီးအကဲ Josep Borrell က ဆိုသည်။
ထို့အပြင် စစ်ကောင်စီအနေဖြင့် နိုင်ငံရေးအကျဉ်းသားအားလုံးကို ပြန်လွှတ်ပေးရန်နှင့် မြန်မာပြည်သူလူထု၏ ဆန္ဒကို လေးစားရန် အထက်ပါအီးယူအကြီးအကဲက တိုက်တွန်းထားသည်။
Public Service Announcement
တရားမဝင်အာဏာသိမ်းစစ်ကောင်စီသည် နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို ပုဒ်မပေါင်း နှစ်ဒါဇင်နီးပါးဖြင့် မတရားသဖြင့် တရားစွဲဆိုခဲ့ကာ ယင်းပုဒ်မများ၏ အမြင့်ဆုံး ပြစ်ဒဏ်များအတိုင်း အမိန့်ချမှတ်ပါက နှစ်ပေါင်း ၁၈၀ ကျော် ထောင်ဒဏ်မှတ်ချခံရမည်ဖြစ်သည်။
မလေးရှားနိုင်ငံခြားရေးဝန်ကြီး Saifuddin Abdullah ကလည်း ဒေါ်အောင်ဆန်းစုကြည်အပေါ် စစ်အုပ်စု၏ ထောင်ဒဏ်ထပ်မံချမှတ်ခြင်းနှင့် မကြာသေးမီက ဒီမိုကရေစီတက်ကြွလှုပ်ရှားသူ လေးဦးကို ကွပ်မျက်ခြင်းသည် အာဆီယံတောင်းဆိုချက်များကို ထပ်ဖန်တလဲလဲ အလေးမထား ခြင်းဖြစ်ကြောင်း ယနေ့ပြောသည်။
မလေးရှားသည် မြန်မာပြည်သူများနှင့်အတူ ရပ်တည်နေပြီး ဒေါ်အောင်ဆန်းစုကြည်ကို ချက်ချင်းပြန်လွှတ်ပေးရေး၊ NUG၊ NUCC တို့နှင့်တွေ့ဆုံဆွေးနွေးရေးတို့ကို အားပေးထောက်ခံကြောင်း Saifuddin Abdullah က ထုတ်ပြန်သည်။
