နေပြည်တော်အကျဉ်းထောင်မှာ မတရားဖမ်းဆီးအကျဉ်းချထားတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို စစ်ကောင်စီက ဒီနေ့မှာ အဂတိအမှု ၄ မှုအတွက် ထောင်ဒဏ် ၆ နှစ်ထပ်မံချလိုက်ပါတယ်။
အဲဒီအမှုတွေဟာ ဒေါ်ခင်ကြည်ဖောင်ဒေးရှင်း နဲ့ပတ်သက်ပြီး စစ်ကောင်စီက တရားစွဲဆိုထားတာဖြစ်ကာ ဒီနေ့ နေပြည်တော်အချုပ်ထောင်တွင်းတရားရုံးက အမိန့်ချလိုက်တာလို့ တရားရုံးအသိုင်းအဝိုင်းကနေသိရပါတယ်။
ဒေါ်ခင်ကြည်ဖောင်ဒေးရှင်းရဲ့ သက်မွေးစိုက်ပျိုးသင်တန်းကျောင်း နေပြည်တော် လရောင်တော စီမံကိန်းမြေနေရာနဲ့ပတ်သက်ပြီး အဂတိအမှု ၃ မှုအတွက် ထောင်ဒဏ် ၃ နှစ် ၊ ရန်ကုန်တိုင်း ဗဟန်းမြို့နယ်အတွင်းက ဒေါ်ခင်ကြည်ဖောင်ဒေးရှင်မြေနေရာနဲ့ပတ်သက်ပြီး စွဲဆိုထားတဲ့အဂတိအမှု အတွက် ထောင်ဒဏ် ၃ နှစ် စုစုပေါင်း ထောင်ဒဏ် ၆ နှစ်ချလိုက်တာဖြစ်ပါတယ်။
ကနဦးက စစ်ကောင်စီဟာ ဒေါ်အောင်ဆန်းစုကြည်ကို ထောင်ဒဏ် ၁၁ နှစ်ချထားပြီးဖြစ်တဲ့အတွက် ထပ်မံချလိုက်တဲ့ထောင်ဒဏ်တွေပါဝင်ရင် စုစုပေါင်းထောင်ဒဏ် ၁၇ နှစ်အထိရှိလာပြီဖြစ်ပါတယ်။
ဒီနေ့ ချတဲ့အမှုတွေဟာ ဒေါ်ခင်ကြည်ဖောင်ဒေးရှင်းမြေနေရာရယူရာမှာ နိုင်ငံံ ဘဏ္ဍာငွေ ထိခိုက်တယ်ဆိုပြီးစစ်ကောင်စီက အဂတိနဲ့တရားစွဲတာဖြစ်ပါတယ်။
လရောင်တောစီမံကိန်းနဲ့ပတ်သက်ပြီးတရားစွဲရာမှာ အဲဒီအချိန်က နေပြည်တော်ကောင်စီ ဥက္ကဋ္ဌ ဖြစ်သူ ဒေါက်တာမျိုးအောင် ၊ဒုမြို့တော်ဝန် ဦးရဲမင်းဦး ၊ ကေ်ာမတီဝင် ဦးမင်းသူတို့ကို ပါ ဒေါ်အောင်ဆန်းစုကြည်နဲ့အတူ စစ်ကောင်စီက အဂတိအမှုနဲ့ အမှုတွဲခဲ့ပါတယ်။
ဒီနေ့အမိန့်ချရာမှာ ဒေါက်တာမျိုးအောင် ၊ဦးရဲမင်းဦးနဲ့ ဦးမင်းသူတို့ကိုပါ ထောင်ဒဏ် ၃ နှစ်စီချခဲ့တယ်လို့ သိရပါတယ်။