စစ်ကိုင်းတိုင်း၊ ခင်ဦးမြို့ပေါ်တွင် ယနေ့နံနက်ပိုင်းက ဗုံးပေါက်ကွဲမှုတစ်ခုဖြစ်ပွားခဲ့ပြီးအသက် (၂၀)အရွယ် လူငယ်တစ်ဦးသေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။
ယနေ့(သြဂုတ်၂၂ရက်) နံနက် ၇ နာရီခန့်က ခင်ဦးမြို့ပေါ်၊ ဗိုလ်ချုပ်ကြေးရုပ်အနီးရှိ “ကျော်စည်ဟိန်း”ဘီယာဆိုင်အတွင်း ဗုံးတစ်လုံးပေါက်ကွဲခဲ့ခြင်းဖြစ်သည်။
အဆိုပါဘီယာဆိုင်နှင့် မျက်နှာချင်းဆိုင် EveryDay လက်ဖက်ရည်ဆိုင်မှ အသက်(၂၀) အရွယ် မောင်ရဲဝင်းထွဋ်ဆိုသူ ဗုံးစထိမှန် သေဆုံးခဲ့ပြီး အခြားမြို့ပေါ်နေ ဒေသခံနှစ်ဦးလည်း ထိခိုက်ဒဏ်ရာရရှိခဲ့ကြောင်း ခင်ဦးမြို့နယ် သတင်းမှန်ပြန်ကြားရေးက အသိပေးသည်။
ပေါက်ကွဲမှုဖြစ်သော ဘီယာဆိုင်မှာ စစ်ကောင်စီတပ်သားများ အမြဲကင်းပုန်းဝပ်သွားလာလှုပ်ရှားနေသော ဆိုင်တစ်ဆိုင်ဖြစ်ကြောင်း ဒေသခံတို့က ဆိုသည်။
အဆိုပါ ပေါက်ကွဲမှုကြောင့် ခင်ဦးမြို့ပေါ်တွင် အကြမ်းဖက်စစ်ကောင်စီတပ်သားများက ကား၊ဆိုင်ကယ်များဖြင့် ကင်းပတ်ကာ ခြေရှုပ်လျက်ရှိကြောင်း၊ ပြည်သူများအနေဖြင့် အသွားအလာဂရုစိုက်ကြရန် ခင်ဦးမြို့နယ်သတင်းမှန်ပြန်ကြားရေးက သတိပေးထားသည်။