စစ်ကိုင်းတိုင်း၊ မင်းကင်းမြို့နယ်တွင် အကြမ်းဖက်စစ်ကောင်စီတပ်က CDM ကျောင်းဆရာ၏ နေအိမ်နှင့် ဒေသခံတစ်ဦး၏ ဆီစက်အား မီးရှို့ဖျက်ဆီးသွားကြောင်း တောင်တွင်း PDF(မင်းကင်း) အဖွဲ့က သတင်းထုတ်ပြန်သည်။
ယမန်နေ့ (သြဂုတ်၂၆ ရက်) မွန်းလွဲ ၂နာရီခန့်က မင်းကင်းမြို့နယ်၊ တောင်တွင်းဒေသ၊ ခင်ဦးကျေးရွာသို့ စစ်ကောင်စီတပ်သားများ ဝင်ရောက်လာကာ CDM ကျောင်းဆရာ ဦးမောင်စိန်၏ နေအိမ်နှင့် ဦးပိုဝင်း၏ ဆီစက်ရုံတို့အား မီးရှို့ဖျက်ဆီးခဲ့ကြောင်း တောင်တွင်း PDF(မင်းကင်း)က အသိပေးသည်။
အဆိုပါ စစ်ကောင်စီတပ်သည် ပြီးခဲ့သည့်ရက်ပိုင်းက ကလေးဝမှ တောင်တွင်းဘက်သို့ စစ်ကား ၇ စီးအပြည့် အင်အား ၁၀၀ကျော်ဖြင့် စစ်ကြောင်း ထိုးလာခဲ့ခြင်းဖြစ်ပြီး ထိတွေ့မှုဖြစ်ပွားခဲ့ကြောင်း တောင်တွင်း PDFက ဆိုသည်။
“ကျွန်တော်တို့အနေဖြင့် မိုင်းများကိုကြိုတင်ပြင် ဆင်ထားသော်လည်း မိုးများရွာနေသည့်အတွက် ထင်သလောက်အလုပ်မဖြစ်ခဲ့ပါ။လက်လုပ်တူမီးကိုသာ အဓိကထားနေရတဲ့ ကျွန်တော်တို့ PDF လေးတွေအတွက်တော့ အခွင့်မသာခဲ့ပါ။ အပြန် အလှန်ထိတွေ့မှုခဏ ဖြစ်ပွားခဲ့ပေမယ့် ထိခိုက်အကျဆုံးကိုတော့ အတိကျမသိရပါ”ဟု တောင်တွင်း PDF၏ ထုတ်ပြန်ချက်တွင် ဖော်ပြသည်။
Public Service Announcement
ဆက်လက်ပြီး တောင်တွင်း PDFက “ကျွန်တော် တို့PDF တွေ အနေနဲ့ကတော့ ရှိတာနဲ့အကောင်းဆုံးရင်ဆိုင်သွားမှာပါ။ဒါပေသိ ထိရောက်တဲ့အောင်ပွဲတွေရဖို့ဆိုရင်တော့ လိုအပ်တဲ့လက်နက်ယမ်းတွေ ကူညီပေးဖို့လိုပါတယ်ဗျ။”ဟု အသိပေးထားသည်။
စစ်ကောင်စီတပ်သည် မင်းကင်းမြို့နယ်တွင် ပျူစောထီးရွာဖြစ်သည့် ပန်းဆက်ရွာ၌ အထိုင်ချကာ PDF လှုပ်ရှားနယ်မြေတဝိုက်သို့ ပျူစောထီးများနှင့် စစ်ကြောင်းထိုးနေသည်။
မင်းကင်းမြို့နယ်၊ ပျဉ်းကိုင်းတဝိုက်တို့တွင် ကုန်းကြောင်းဖြင့် စစ်ကြောင်းထိုးရှင်းလင်းရေးလုပ် ဆောင်ပြီး နယ်မြေစိုးမိုးမှုရရှိရန် စီမံချက်ချနေသည်ကိုတွေ့ရကြောင်း မင်းကင်းနွေဦးတော်လှန်ရေးသတင်းစဉ်က ဖော်ပြသည်။
မင်းကင်းမြို့နယ်အတွင်း စစ်ကြောင်းထိုးရန် အင်အား (၁၅၀)ခန့်ပါ စစ်ကောင်စီတပ်သည် ကလေး၀-ယာကြီးလမ်းပိုင်းရှိ စခန်းကြီးကျေးရွာတွင်စခန်းချနေကြောင်း သိရသည်။
