▪︎အမေရိကန် ၁ ဒေါ်လာ ၃,၄၀၀ကျပ်၊ ထိုင်း ၁ဘတ် ၁၀၀ ခန့်၊ တရုတ် ၁ ယွမ် ၄၅၀ အထိစံချိန်တင်ရောက်ရှိ
ကျပ်ငွေတန်ဖိုးကျဆင်းရခြင်းမှာ အမေရိကန်ဗဟိုဘဏ်က အတိုးနှုန်းဆက်တိုက်မြှင့်တင်နေခြင်းနှင့် သတင်းမီဒီယာများက ဒေါ်လာဈေးတက်အောင် ရေးသားခြင်းတို့ကြောင့်ဖြစ်သည်ဟု စစ်ကောင်စီ၏ဗဟိုဘဏ်က အပြစ်ပုံချလိုက်သည်။
သမိုင်းတလျှောက် ကျပ်ငွေတန်ဖိုးစံချိန်တင်ကျဆင်းနေချိန်တွင် စစ်ကောင်စီ၏ဗဟိုဘဏ်က သတင်းမီဒီယာနှင့် အမေရိကန်ဗဟိုဘဏ်တို့အပေါ် ယနေ့တွင်အပြစ်တင်လိုက်ခြင်းဖြစ်သည်။
စစ်ကောင်စီ၏ဗဟိုဘဏ်က တရားမဝင်မီဒီယာများသည် နိုင်ငံ့စီးပွားရေးတိုးတက်မှုအဟန့်အတားဖြစ်စေရန်နှင့် ပြည်သူများ စိုးရိမ်မှုမြင့်တက်စေရန် ရေးသားနေကြသည်ဟု အပြစ်တင်သည်။ ထိုအပြင် အမေရိကန်ဗဟိုဘဏ်က အတိုးနှုန်းကိုဆက်တက်မြင့်တက်နေခြင်းကြောင့်ဒေါ်လာအားကောင်းလာပြီးအခြားငွေကြေးများလည်းကျဆင်းနေည်ဟုလည်းစစ်ကောင်စီက အကြောင်းပြထားသည်။
ထိုအပြင် အွန်လိုင်းမှ ဒေါ်လာအရောင်းအဝယ်လုပ်ကိုင်နေသူများကလည်း ဒေါ်လာဈေးကစားနေသည်ဟုစွပ်စွဲလိုက်ပြီး အွန်လိုင်းမှဒေါ်လာရောင်းဝယ်သူများကိုလည်း ဖမ်းဆီးအရေးယူမည်ဟုလည်းစစ်ကောင်စီကခြိမ်းခြောက်ထားသည်။
“လက်ရှိ တစ်ကမ္ဘာလုံးမှာ ဒေါ်လာဈေးတက်တာကတစ်ပိုင်းတစ်စပါပါတယ်။ ဒါပေ့မယ့်အခုဖြစ်နေတာကလူတွေကကျပ်ငွေကိုမယုံတော့တာ။ ဒါကြောင့် ထိုင်းဘတ်ငွေ၊ တရုတ်ယွမ်တွေပါ ဈေးလိုက်တက်နေတာ”ဟု စီးပွားရေးလုပ်ငန်းရှင်တစ်ဦးက မှတ်ချက်ပေးသည်။
ရွှေဈေး၊ ဒေါ်လာနှင့် စက်သုံးဆီဈေး နေ့စဉ်မြင့်တက်နေပြီး တစ်ရက်လျှင် တစ်ဒေါ်လာကို အနည်းဆုံးကျပ်တစ်ရာကျော်နှင့် ရွှေတစ်ကျပ်သားကို ကျပ် ၁ သိန်းကျော်အထိ့စံချိန်တင်မြင့်တက်နေသည်ဟု လုပ်ငန်းရှင်များကပြောသည်။
“အခုဖြစ်နေတာက စီးပွားရေးကြောင့်ဖြစ်တဲ့ ပြသာနာမဟုတ်ဘူး။ နိုင်ငံရေးကြောင့်ဖြစ်တဲ့ ပြသာနာပါ။ အခုလက်ရှိ စစ်ကောင်စီကို ဘယ်သူမှ မယုံတော့လို့ သူတို့ထိန်းချုပ်တဲ့ ကျပ်ငွေကိုလည်း မယုံကြည်တော့တာ။ လူမှုဘဝမှကော ၊ စီးပွားရေးပတ်ဝန်းကျင်မှာကော ယုံကြည်ပျက်သုဉ်းကုန်လို့ အခုလို ဖြစ်နေတာပါ။”ဟု အခြားစီးပွားရေးလုပ်ငန်းရှင်တစ်ဦးကလည်းပြောသည်။
ဩဂုတ် ၂၇ ရက်တွင် တစ်ဒေါ်လာကို ၃၄၀၀ကျပ်၊ အခေါက်ရွှေတစ်ကျပ်သားကို ကျပ် ၂,၉၂၅,၀၀၀ကျပ်နှင့် ပရီမီယံဓာတ်ဆီတစ်လီတာကို ကျပ် ၃၃၀၅ကျပ်အထိ ပေါက်ဈေးရှိလာသည်။ထိုင်းဘတ်ငွေလဲနှုန်းတွင်လည်း ၁ ဘတ်လျှင် ကျပ် ၁၀၀ နီးပါးအထိ့ စံချိန်တင်ကျပ်တန်ဖိုးကျဆင်းသွားသည်။အလာတူတရုတ်ငွေ တစ်ယွမ်ကို မြန်မာကျပ်ငွေ ၄၅၀အထိ မြင့်တက်နေသည်။
ကျပ်ငွေတန်ဖိုးကျဆင်းနေမှုကို ဖြေရှင်းရန် စစ်ကောင်စီ၏ဗဟိုဘဏ်ကလုပ်ငန်းရှင်များကိုနေပြည်တော်သို့ခေါ်ယူဆွေးနွေးနေသည်ဟုလည်းဆိုသည်။