စစ်ကောင်စီတပ်၏ ထိုးစစ်ဆင် စစ်ရေးလှုပ်ရှားမှုကြောင့် စစ်ကိုင်းတိုင်းရှိ ကန့်ဘလူ၊ ကျွန်းလှနှင့် ကောလင်းမြို့နယ် များမှကျေးရွာပေါင်း ၃၄ရွာမှ ဒေသခံ ပြည်သူ သုံးသောင်းကျော် စစ်ဘေးရှောင်နေရပြီး အရေးပေါ် အကူအညီများလိုအပ်နေသည်ဟု ကျွန်းလှတက်ကြွလှုပ်ရှားသူများ အဖွဲ့က သတင်းထုတ်ပြန်သည်။
ယင်းကျေးရွာများအနက် ရွာအချို့ကို စစ်ကောင်စီတပ်က မီးရှို့ဖျက်ဆီးမှုများ လုပ်ဆောင်ခဲ့ရာ ရွာလုံးကျွတ် နီးပါး မီးလောင်ပြာကျခဲ့သည့် ရွာလည်းပါဝင်သည်။
ဩဂုတ် ၂၃ရက်က တိုက်ပွဲပြင်းထန်ခဲ့သည့် နေရာအနီးရှိ ကောလင်းမြို့နယ် အောင်ချမ်းသာရွာကို စစ်ကောင်စီတပ်က ဩဂုတ် ၂၄ရက်တွင် မီးရှို့ခဲ့ရာ အိမ်ခြေ ၇၅ အိမ်ရှိသည့်အနက် ၇၃အိမ် မီးလောင်ပျက်စီးခဲ့ရသည်ဟု ဆိုသည်။
စစ်ရှောင်များအတွက် မိုးကာ၊ဖျာ၊အဝတ်အထည်၊ဆေးဝါးနှင့်တခြားအကူအညီများစွာ လိုအပ်လျှက်ရှိကြောင်း ဒေသခံများ၏ပြောကြားချက်ကို ကျွန်းလှတက်ကြွလှုပ်ရှားသူများ အဖွဲ့က အသိပေးထားသည်။
စစ်ကောင်စီတပ်သည် ဩဂုတ် ၂၅ရက်တွင်လည်း ကျွန်းလှမြို့နယ် ရှိကျေးရွာများသို့ ရဟတ်ယာဉ်ဖြင့် တိုက်ခိုက်ခြင်း၊ စစ်အင်အားအများအပြား ပို့ဆောင်ခြင်းပြုလုပ်ခဲ့ပြီး ဩဂုတ် ၂၆ရက်တွင် ကုန်းစည်းရွာနှင့် တည်ပင်ဆိပ်ရွာတို့ကို မီးရှို့ဖျက်ဆီးခဲ့သည်ဟု ဆိုသည်။
ကောလင်း၊ ကျွန်းလှ၊ ကန့်ဘလူ သုံးမြို့နယ်အဆက်ရှိ အောင်ချမ်းသာရွာအနီး တိုက်ပွဲတွင် စစ်ကောင်စီတပ်က အများအပြားသေဆုံးပြီး အရာရှိများ ဖမ်းဆီးခံရကာ လက်နက်ခဲယမ်းများစွာကို ဒေသတွင်း ပြည်သူ့ကာကွယ်ရေးတပ်များက သိမ်းဆည်းရရှိခဲ့သည်။ အဆိုပါ ဖြစ်စဉ်အပြီးနောက်ပိုင်းတွင် စစ်ကောင်စီတပ်က အင်အားများစွာဖြင့် ဒေသတွင်းသို့ စီးနင်းတိုက်ခိုက်မှုများ လုပ်ဆောင်လျက်ရှိသည်။