ကရင်အမျိုးသားအစည်းအရုံး(KNU) တပ်မဟာ (၅) ထံသို့ စစ်ကောင်စီတပ်မှ တပ်သားတစ်ဦး လက်နက်နှင့်အတူ အလင်းဝင်ရောက်လာကြောင်း တပ်မဟာ(၅)က ယနေ့ စက်တင်ဘာ ၂ရက်တွင် သတင်းထုတ်ပြန်သည်။
စစ်ကောင်စီ၏ အမှတ်(၈) စစ်ဆင်ရေးကွပ်ကဲမှုဌာနချုပ်၊ ခမရ (၅၉၃)မှ အသက် (၂၅)နှစ်ရှိ တပ်သား သန့်ဇင်အောင်သည် MA-3 တစ်လက် ကျည် ၁၇ တောင့်၊ လက်ပစ်ဗုံးတစ်လုံးနှင့်အတူ အလင်း ဝင်လာခြင်းဖြစ်သည်ဟု ဖော်ပြထားသည်။
ထိုသို့ အလင်းဝင်လာသည့် စစ်ကောင်စီတပ်သားကို ကောင်းမွန်စွာ လက်ခံကြိုဆိုပြီး ကျပ်သိန်း ၂၀ ပေးအပ်ခဲ့ကြောင်း တပ်မဟာ(၅)တာဝန်ရှိသူတစ်ဦး၏ ပြောကြားချက်ကို ဖော်ပြထားသည်။
ထို့ပြင် တပ်သား သန့်ဇင်အောင်က စစ်ကောင်စီတပ်မှ ထွက်ပြေးလာရသည့် အကြောင်းအရင်း ပြောကြားချက်ကိုလည်း ဖော်ပြထားရာ အမှုထမ်းဆောင်နေချိန်၌ အထက်အရာရှိများက လက်အောက်ငယ်သားများအပေါ် မတရား ဖိနှိပ်ချုပ်ချယ်ခြင်း၊ ခွဲခြားဆက်ဆံခြင်းနှင့် ရှေ့တန်း တွင် အစား၀၀လင်လင် စားခွင့်မရခြင်းတို့ကြောင့် ဖြစ်သည်ဟု ဆိုသည်။
Public Service Announcement
၎င်းအနေဖြင့် ထိုင်းနိုင်ငံဘက်သို့ အလုပ်ရှာပြီး မိဘကို ပြန်လည်ထောက်ပံရန် စိတ်ကူးထားကြောင်းလည်း တပ်သား သန့်ဇင်အောင်က ပြောကြားခဲ့သည်ဟု ဖော်ပြသည်။
