မြဝတီ-ဝေါ်လေ ကားလမ်းပေါ်က သုံးထပ်ကွေ့အနီး ကျော်ဝါးဘိုးဘုရားမှာ တပ်စွဲထားတဲ့ စစ်ကောင်စီတပ်က လက်နက်ကြီးနဲ့ပစ်လို့ လုံခြုံရေးတာဝန်ယူထားတဲ့ ကော်ဘရာစစ်ကြောင်း စစ်သည်နှစ်ဦး ဒဏ်ရာရှိသွားခဲ့တယ်လို့ ကော်ဘရာစစ်ကြောင်းက သတင်းထုတ်ပြန်ပါတယ်။
စစ်ကောင်စီရဲ့ တပ်မ(၄၄)လက်အောက်ခံ ခမရ(၁၀၂)နဲ့ အမြှောက်တပ်ဖွဲ့တွေဟာ စက်တင်ဘာ(၅)ရက် ည(၈)နာရီခွဲက တစ်ကြိမ်၊ စက်တင်ဘာ(၆)ရက်နေ့ မနက်(၁၁)ခွဲကနေ (၁၂) နာရီအထိ လက်နက်ကြီးပစ်ခတ်ခဲ့တယ်လို့ ထုတ်ပြန်ချက်မှာဖော်ပြထားပါတယ်။
ဒီလိုပစ်ခတ်တာတွေကြောင့် ကော်ဘရာစစ်ကြောင်း လုံခြုံရေးတာဝန်ယူတဲ့ သဲဖြူချောင်းလမ်းဆုံနဲ့ နေရာတစ်ချို့ကို လက်နက်ကြီး ကျည်ကျရောက်ခဲ့ပြီး စစ်ကောင်စီရဲ့(၁၂၀)မမ လက်နက်ကြီး(၁၂) လုံး ပစ်ခတ်မှုကြောင့် ကော်ဘရာစစ်သည်တော် (၂) ဦး ခဲစထိမှန်ကာ (မစိုးရိမ်ရ) ဒဏ်ရာ ရရှိခဲ့တယ်လို့ ထုတ်ပြန်ချက်အရ သိရပါတယ်။
