ပြည်သူ့ခုခံတွန်းလှန်စစ်(D-Day) တစ်နှစ်ပြည့် စစ်ဆင်ရေးအဖြစ် ကျွန်းစုနယ်မှ ပျူစောထီးအဖွဲ့ကို ပစ်ခတ်တိုက်ခိုက်ခဲ့ရာ ပျူခေါင်းဆောင်အပါအဝင် နှစ်ဦးသေဆုံးသွားကြောင်း တနသ်ာရီ ပြည်သူ့ကာကွယ်ရေးတပ်ဖွဲ့က ယနေ့(စက်တင်ဘာ ၇) ထုတ်ပြန်သည်။
ကျွန်းစုမြို့နယ် ပဲ့တိုင်ကျေးရွာတွင် မြိတ်ခရိုင်တပ်ရင်း (၂) တပ်ခွဲ (၂)နှင့် တနင်္သာရီကာကွယ် ရေးပြောက်ကျား ပူပေါင်းအဖွဲ့တို့မှ စစ်ကောင်စီ၏ ပျူစောထီး အဖွဲ့အား ယနေ့နံနက် ၅ နာရီခွဲခန့်တွင် ပစ်ခတ်တိုက်ခိုက်ခဲ့ခြင်းဖြစ်ကြောင်း ဖော်ပြသည်။
အဆိုပါတိုက်ခိုက်မှုတွင် ပျူစောထီးခေါင်းဆောင် အိုနီဒီးဒူ အပါအဝင် ပျူနှစ်ဦးသေပြီး ပူပေါင်းအဖွဲ့မှ ရဲဘော်တစ်ဥိး မစိုးရိမ်ရ ဒဏ်ရာရရှိခဲ့ကာ နံနက် ၇ နာရီအချိန်တွင် တိုက်ပွဲရပ်နားခဲ့သည်ဟု ဆိုသည်။
အလားတူ စက်တင်ဘာ ၄ ရက် နံနက် ၁၁ နာရီခန့်ကလည်း တနင်္သာရီမြို့နယ် လယ်သစ်-ထိန်ချောင်းဝအနီး စစ်ကြောင်းထိုးလာသော စစ်ကောင်စီတပ်နှင့် ပျူစောထီးများအား မြိတ်ခရိုင်တပ်ရင်း(၂)တပ်ခွဲ(၂)၊တနင်္သာ ရီ(ပ.က.ဖ) တနင်္သာရီကာကွယ်ရေးပြောက်ကျား၊တနင်္သာရီရိုးမပြည့်သူကာကွယ်ရေးအဖွဲ့တို့မှ တိုက်ခိုက်ခဲ့သေးသည်။
Public Service Announcement
အဆိုပါ တိုက်ပွဲတွင် စစ်ကောင်စီတပ်မှ သုံးဦးနှင့် ပျူစောထီးနှစ်ဦးသေဆုံးပြီး တစ်ဦးဒဏ်ရာပြင်းထန်စွာရရှိခဲ့ကာ ပြည်သူ့ကာကွယ်ရေးအဖွဲ့နှင့် ပူးပေါင်းတပ်ဖွဲ့ဝင်အားလုံး ဘေးကင်းကြောင်း အသိပေးထုတ်ပြန်ထားသည်။
စစ်အာဏာရှင်ဆန့်ကျင်ရေး နွေဦးတော်လှန်ရေးနှင့်စပ်လျဥ်းပြီး အမျိုးသားညီညွတ်ရေးအစိုးရ(NUG)က ခုခံစစ်ဆင်နွှဲရန် ပြီးခဲ့သည့် ၂၀၂၁ စက်တင်ဘာ ၇ရက်တွင် D-Day ကြေညာခဲ့သည်။
