ကျပ်သိန်းတစ်ရာချီးမြှင့်ခံရပြီး လွတ်မြောက်နယ်မြေသို့ ပို့ဆောင်
မကွေးတိုင်း၊ ပေါက်မြို့မရဲစခန်းမှ ရဲတပ်သားတစ်ဦး လက်နက်နှင့်ကျည် အပြည့်အစုံဖြင့် CDM ဝင်ရောက်လာပြီး ၎င်းအား ကျပ်သိန်းတစ်ရာချီးမြှင့်ကာ လွတ်မြောက်နယ်မြေသို့ ပို့ဆောင်ခဲ့ကြောင်း မြိုင်မြို့နယ်ပြည်သူ့ကာကွယ်ရေးတပ်ဖွဲ့က သတင်းထုတ်ပြန်သည်။
မြိုင်မြို့နယ်ပြည်သူ့ကာကွယ်ရေးတပ်ဖွဲ့သို့ ပေါက်မြို့နယ်ရဲစခန်းမှ ရဲတပ်သားတစ်ဦးသည် G3 တစ်လက်၊ကျည်ဘောက်၂ ခု၊ လက်ထိပ် ၁ စုံ၊ ကျည် ၁၃၂ တောင့်ဖြင့် CDM လုပ်ကာ ပြည်သူနှင့် ပူးပေါင်းလာပါသဖြင့် သိန်း ၁၀၀ဆုချီးမြင့်ပြီး လွတ်မြောက်နယ်မြေသို့ ပို့ဆောင်ထားကြောင်း မြိုင်(ပကဖ)အဖွဲ့က ယနေ့ (စက်တင်ဘာ ၁၃ ရက်) အသိပေးသည်။
“သူက ပေါက်မြို့မရဲစခန်းကနေ CDMဝင်ဖို့ ချိတ်ဆက်ထားတာ တစ်လလောက်ရှိပြီ။ ကျွန်တော်တို့က အခြေအနေကြောင့် မိုးနဲ့လေနဲ့မို့ အခုမိုးခြောက်လေခြောက်မှ သွားခေါ်လာတာ။ စကစအောက်က ဝန်ထမ်းတွေ CDM ဝင်ကြပါ။ကျွန်တော်တို့ကတော့ အရင်တုန်းကလို သုတ်သင်ရှင်းလင်းတာတွေ မလုပ်ချင်တော့ဘူး။ သူတို့မှာလည်း မိသားစုဝင်တွေရှိမယ်။ ကျွန်တော်တို့မှာလည်း မိသားစုတွေရှိတယ်။ တခြားသူတွေလည်း စိတ်ဆင်းရဲမယ်။ အမြင်မှန်ရပြီး CDMဝင်ကြဖို့ တိုက်တွန်းပါတယ်။”ဟု ဗိုလ်လက်ယျာက ပြောသည်။
ကျန်ရှိရဲနှင့် စစ်သားများအနေဖြင့် အမြင်မှန်ရကာ ပြည်သူနှင့်ပူးပေါင်းပြီး CDM လုပ်စေလိုကြောင်း မြိုင်(ပကဖ)က သတိပေးတိုက်တွန်းသည်။
Public Service Announcement
မြိုင်မြို့နယ်ပြည်သူ့ကာကွယ်ရေးတပ်ဖွဲ့သည် ၎င်းတို့နယ်တစ်ဝိုက်ရှိ စစ်သားတစ်ဦးအပါအဝင် ရဲ ၁၅ဦးခန့် CDM ဝင်ရောက်အောင် ဆောင်ရွက်ပေးနိုင်ခဲ့ပြီး လွတ်မြောက်နယ်မြေသို့ ပို့ဆောင်ပေးခဲ့သည်။
