စစ်ကောင်တပ်သား အများအပြား ထိခိုက်သေဆုံးနိုင်ဟုဆို
စစ်ကိုင်းတိုင်း၊ မုံရွာ – မန္တလေးလမ်းမကြီးပေါ်တွင် မိုင်းထိ၍ ပျက်သွားသော ယာဥ်နှစ်စီးအား လာယူသည့် စစ်ကောင်စီယာဥ်တန်းအား နှစ်ကြိမ် မိုင်းဆွဲတိုက်ခိုက်ရာ ထိခိုက်သေဆုံးမှုများရှိကြောင်း မုံရွာမြို့နယ်တောင်ပိုင်း ပြည်သူ့ကာကွယ်ရေးတပ်ဖွဲ့ PDF-South Monywaက သတင်းထုတ်ပြန်သည်။
ယမန်နေ့က မိုင်းထိ၍ ကားပျက်ပြီး ကျန်ရစ်သော စစ်ကား နှစ်စီးအား ဆွဲယူပြီး ပြန်လာသည့် စစ်ကောင်စီ၏ ၆စီးယာဥ်တန်းအား ယနေ့(စက်တင်ဘာလ ၂၇ ရက်) နံနက် ၄ နာရီကျော်က မုံရွာ – ချောင်းဦးလမ်းပိုင်းတစ်နေရာတွင် Monywa Ranger Group၊ Truth Army အဖွဲ့များနှင့် ပူးပေါင်း၍ ပဒေသာမိုင်း သုံးလုံးခွဲကာ တိုက်ခိုက်ခဲ့ကြောင်း PDF-South Monywaက အသိပေးသည်။
နှစ်စီးမြောက်နှင့် လေးစီးမြောက် ယာဥ်သည် ပျက်နေသည့် ယာဥ်များဖြစ်ပြီး သုံးစီးမြောက်ယာဥ် နှင့် ငါးစီးမြောက်ယာဥ် ထိသွားကြောင်း၊ မိုင်းများကွဲသည်နှင့် အာပီဂျီတစ်ချက်အပါအဝင် လက်နက်များဖြင့် လမ်းဘေးသို့ ပစ်ခတ်ကာ မောင်းပြေးသွားကြကြောင်း PDF-South Monywaက ပြောသည်။
နောက်ထပ် ၁၃ မိနစ်ခန့်အကြာတွင် အဆိုပါ ယာဥ်တန်းကိုပင် Farmers Revolution Force – FRF နှင့်ပူးပေါင်း၍ ဒုတိယပွိုင့်နေရာအရောက်၌ ပဒေသာမိုင်း သုံးလုံး ထပ်မံတိုက်ခိုက်ခဲ့သည်။
Public Service Announcement
နောက်ဆုံး ခြောက်စီးမြောက်ယာဥ်မှာ ဘော်ဒီထိမှန်၍ ကားမှန်များပါကွဲကြေကာ အချိန်အတော်ကြာ ထိုးရပ်သွားကြောင်း၊ ရှေ့ကားတစ်စီး ပြန်လှည့်၍ မိုင်းထိသော ယာဥ်အား ကြိုးဖြင့်ဆွဲကာ မောင်းပြေးသွားကြောင်း PDF-South Monywaက ပြောသည်။
ပထမဖြစ်စဥ်တွင် စစ်ကောင်စီတပ်သား သုံးဦး၊ ဒုတိယဖြစ်စဥ်တွင် စစ်ကောင်စီတပ်သား ခုနစ်ဦး သေဆုံးပြီး ထိခိုက်ဒဏ်ရာရသူအများအပြားရှိသည်ဟု PDF-South Monywaက ဆိုသည်။
ထို့အပြင် ပြည်သူ့ရဲဘော်များ ပွန်းပဲ့သည်များမှအပ ကြီးကြီးမားမား ဒဏ်ရာရရှိခဲ့ခြင်း မရှိကြောင်း သိရသည်။
ယနေ့နံနက်စောစော မိုင်းသံများကြောင့် မနီးမဝေးနေရာများမှ မြေများနှင့် အိမ်များပါတုန်ကာပြည်သူများ လန့်နိုးကြောင်း သိရ၍ တောင်းပန်ကြောင်း PDF-South Monywaက ပြောသည်။
ဖြစ်စဥ်နှင့်ပတ်သက်၍ PDF-South Monywa၏ တာဝန်ရှိသူ Daung Karyan က “ပထမပွိုင့်ဆွဲပြီးကတည်းက ဒီကောင်တွေလမ်းတစ်လျှောက်ပစ်လိုက်တာ နောက်တစ်ပွိုင့်ဆွဲလိုက်တဲ့အချိန်မှာ သေနတ်သံတွေပါရပ်ပြီး ကားပါထိုးရပ်သွားတာ။ ဒီကောင်တွေတော်တော်သေမယ်ဗျ။ ရှေ့ကားတစ်စီးချက်ချင်းပြန်လှည့်လာပြီး ကြိုးနဲ့ပါဆွဲပြီး မောင်းထွက်သွားကြတယ်။”ဟု ပြောသည်။
စက်တင်ဘာ ၂၅ ရက် နှင့် ၂၆ ရက်များက မုံရွာ – မန္တလေးလမ်းမကြီးပေါ်တွင် စစ်ကောင်စီယာဥ်တန်းအား ဒေသကာကွယ်ရေးအဖွဲ့များက လမ်းတစ်လျှောက် မိုင်းဆွဲတိုက်ခိုက်ခဲ့ကြသည်။
