မန္တလေးတိုင်း၊ မတ္တရာမြို့နယ်၊ ဧရာဝတီမြစ်အတွင်းရှိ ကျေးရွာများအား စစ်ကောင်စီတပ်က စစ်ကြောင်းထိုးဖျက်ဆီးသတ်ဖြတ်နေ၍ ရွာခံများ ထွက်ပြေးတိမ်းရှောင်နေရကြောင်း ဒေသခံများက ပြောသည်။
မတ္တရာမြို့နယ်၊ ရေလယ်ကျွန်း ကျေးရွာအပါအဝင် ကျေးရွာအချို့ကို စက်တင်ဘာအတွင်း၌ စစ်ကောင်စီတပ်က စစ်ကြောင်းထိုးဝင်ရောက်ကာ ပစ်ခတ်ဖမ်းဆီးသတ်ဖြတ်ခြင်း၊ နေအိမ်များအား မီးရှို့ဖျက်ဆီးခြင်းများ ပြုလုပ်နေ၍ ပြည်သူရာချီ နေအိမ်စွန့်ခွာ ထွက်ပြေးတိမ်းရှောင်နေရကြောင်း ဒေသခံများက ပြောသည်။
“ရေလယ်ကျွန်းကနေအိမ်တွေ မီးရှို့ခံရတာ နှစ်ကြိမ် ရှိပါပြီ။ ရွာသူရွာသားများ မနေရဲတဲ့အတွက် ပြင်ဦးလွင်ခရိုင် ပ. က. ဖ. ကောင်းကင်တပ်ဖွဲ့က စစ်ဘေးရှောင်စခန်း ဖွင့်လှစ်ပေးထားပါတယ်။”ဟု ကောင်းကင်တော်လှန်ရေးအင်းအားစုက ပြောသည်။
စစ်ဘေးရှောင်ပြည်သူများ စားဝတ်နေရေး ကျန်းမာရေးအတွက် အကူအညီများ လိုအပ်နေ၍ ပါဝင်လှူဒါန်းပေးကြရန် ကောင်းကင်တော်လှန်ရေးအင်းအားစုက မေတ္တာရပ်ခံသည်။
ဧရာဝတီမြစ်အတွင်း ကျွန်းပေါ်ကျေးရွာများတွင် တံငါလုပ်ငန်းများကိုလည်း လုပ်ကိုင်ကြပြီး စစ်ကောင်စီတပ်က ပစ်ခတ်သတ်ဖြတ်နေ၍ ညပိုင်းငါးဖမ်းခြင်းလုပ်ငန်းများအား ရပ်ဆိုင်းထားရကြောင်း ဒေသခံများက ပြောသည်။
အခင်းဖြစ်ရာ မြစ်အတွင်းကျွန်းပေါ်ကျေးရွာများတွင် စစ်ကောင်စီတပ်က မကြာခဏပစ်ခတ်ဖမ်းဆီးမှုများ ပြုလုပ်နေပြီး မြစ်တစ်ဖက်ကမ်းရှိ စစ်ကိုင်းတိုင်း၊ ဝက်လက်နယ်က ဒေသကာကွယ်ရေးတပ်များကိုပါ မကြာခဏသွားရောက်တိုက်ခိုက်လေ့ရှိသည်။
ထွက်ပြေးတိမ်းရှောင်နေရသော ရေလယ်ကျွန်းရွာဒေသခံများအား တွေ့ရစဥ်၊ ဓာတ်ပုံ-ကောင်းကင် တော်လှန်ရေးအင်းအားစု