နိုင်ငံတော်ပိုင်ရွှေများကို စစ်ကောင်စီအတွက်ရောင်းပေးရာတွင်ပါဝင်ပတ်သပ်သူအားလုံးကို အရေးယူမည်ဟု အမျိုးသားညီညွတ်ရေးအစိုးရ( NUG )သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ယနေ့(အောက်တိုဘာ ၂ ရက်)တွင် ထုတ်ပြန်သည်။
စစ်ကောင်စီလက်အောက်ခံ ဌာနဆိုင်ရာများသည် ဗဟိုဘဏ်တွင် အပ်နှံထားသည့် နိုင်ငံတော်ပိုင် ရွှေဒင်္ဂါးပြားများနှင့် ရွှေစင်ချောင်းများကို စီမံချက်ဖြင့်ရောင်းချနေခြင်းအပေါ် NUG၏ ဝန်ကြီးဌာနက ယခုလို တုန့်ပြန်လိုက်ခြင်းဖြစ်သည်။
နိုင်ငံတော်အာဏာသိမ်းထားသည့် စစ်ကောင်စီကို ပြည်သူ့တစ်ရပ်လုံးက အမြင့်ဆုံးတော်လှန်ရေး ဆင်နွှဲနေချိန်တွင် စစ်ကောင်စီလက်အောက်ခံ Non CDM ဝန်ထမ်းများသည် စစ်ကောင်စီအတွက် နိုင်ငံတော်ပိုင်ပစ္စည်းများကိုရောင်းချခြင်းဖြင့် ရှာဖွေပေးနေခြင်းဖြစ်ပြီး၊ ထိုသို့ဆောင်ရွက်ပေးနေသည့်စစ်ကောင်စီလက်အောက်ခံ မြန်မာနိုင်ငံတော်ဗဟိုဘဏ်၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ မြန်မာ့ကျောက်မျက်ရတနာရောင်းဝယ်ရေးလုပ်ငန်းနှင့် အမှတ် (၂) သတ္တုတွင်းလုပ်ငန်းတို့မှ စီမံခန့်ခွဲသူအရာရှိကြီးများ၊ အရာရှိများ၊ အရာထမ်းနှင့် ပါဝင်ပတ်သတ်သူများကို အရေးယူမည်ဟု NUGကသတိပေးသည်။
စစ်ကောင်စီက ရန်ကုန်မြို့နှင့် မန္တလေးမြို့တို့တွင် ရွှေစင်တုံးနှင့် ရွှေစင်ခဲ သုံးပိဿာစီကို စက်တင်ဘာ ၂၉ ရက်က ဈေးပြိုင်တင်ဒါစနစ်ဖြင့်ရောင်းချမည်ဟု ထုတ်ပြန်ကြေညာခဲ့သည်။
Public Service Announcement
စက်တင်ဘာလအတွင်းကလည်း ရွှေဒင်္ဂါးပြားများကို ရောင်းချခဲ့သည်။ ထိုသို့ရောင်းချရာတွင် ပြင်ပပေါက်ဈေးထက်ဈေးပိုမိုများသဖြင့် ဝယ်ယူသူအနည်းငယ်သာရှိခဲ့သည်ဟု ရွှေလုပ်ငန်းရှင်များကပြောသည်။
