စစ်ကိုင်းတိုင်း၊ မုံရွာ – မန္တလေးလမ်းပိုင်း၌ စစ်ကောင်စီယာဥ်တန်းတိုက်ခိုက်ခံရပြီး ယာဥ်နှစ်စီးပျက်စီးကာ အများအပြားထိခိုက်၍ နာရေးယာဥ်နှစ်စီးဖြင့် သယ်ဆောင်သွားကြောင်း မြောင်မြို့နယ်(TGR) ပြည်သူ့ကာကွယ်ရေးတပ်ဖွဲ့က ပြောသည်။
ယမန်နေ့ (အောက်တိုဘာ ၂ ရက်)နံနက် ၁၁ နာရီခန့်က စစ်ကိုင်းမှ မုံရွာမြို့သို့ထွက်လာသော စစ်ကောင်စီယာဥ် ခြောက်စီးအား ဂွေးပင်တောကျေးရွာနှင့် နတ်ရေကန်ကျေးရွာကြားတွင် ပဒေသာမိုင်း (၆)လုံးဖြင့် တိုက်ခိုက်ခဲ့ရာ ယာဥ်နှစ်စီးပျက်စီးသွားကြောင်း မြောင် (T.G.R) ပြည်သူ့ကာကွယ်ရေးတပ်ဖွဲ့က ပြောသည်။
နာရေးယာဥ် နှစ်စီးဖြင့် ချောင်းဦးဆေးရုံခေါ်ဆောင်သွားရာ ဒဏ်ရာများပြင်းထန်၍ ၁၅ ဦးခန့်သေဆုံးမှုရှိခဲ့ကြောင်း မြောင် T.G.R ပြည်သူ့ကာကွယ်ရေးတပ်ဖွဲ့က ဆိုသည်။
မြောင်မြို့နယ်(T.G.R)ပြည်သူ့ကာကွယ်ရေးတပ်က ဗိုလ်တိုက်ဂါးက “စစ်ကောင်စီတပ်က လမ်းဘေးဝဲယာကိုလည်း ပစ်တယ်။ T.G.R Women Drone Force ကလည်း ဒရုန်းနဲ့ ကားပေါ်ဗုံးချ တိုက်ခိုက်ခဲ့ပါသေးတယ်။ နာရေးကားနှစ်စီးနဲ့ကို နှစ်ခါသယ်သွားရတာ”ဟု ပြောသည်။
ယမန်နေ့နံနက်ပိုင်းက စစ်ကိုင်းမှ မုံရွာမြို့သို့ထွက်ခွာလာသည့် စစ်ကောင်စီယာဥ်တန်းအား မုံရွာ – မန္တလေးလမ်းတစ်လျှောက် ဒေသတွင်းကာကွယ်ရေးအဖွဲ့များက မိုင်းဆွဲတိုက်ခိုက်ခဲ့ကြသည်။