ကရင်ပြည်နယ်၊ မြဝတီမြို့နယ် မြဝတီ – ကော့ကရိတ် အာရှလမ်းမကြီးပေါ်တွင် ‘ပွင့်နေခြည်’ ဇာတ်အဖွဲ့ကား တိမ်းမှောက်ခဲ့ရာ (၂)နှစ်ကလေးငယ်တစ်ဦးအပါအဝင် ဇာတ်သဘင်အနုပညာရှင် ၁၁ဦး သေဆုံးခဲ့ကြောင်း သဘင်အနုပညာအသိုင်းအဝိုင်းက ပြောသည်။
ယမန်နေ့ (အောက်တိုဘာ ၅ ရက်) ညနေ ၄ နာရီ ၄၅မိနစ်ခန့်က မြဝတီမြို့နယ် ကွမ်းခြံကုန်းအဆင်းတွင် မွန်ပြည်နယ်အခြေစိုက် ‘ပွင့်နေခြည်’ဇာတ်အဖွဲ့ ကားတိမ်းမှောက်ခဲ့ရာ ယခုအချိန်ထိ အနုပညာရှင် ၁၁ဦးကွယ်လွန်ပြီး ၂၀ဦး ဒဏ်ရာရရှိခဲ့ကြောင်း မြန်မာနိုင်ငံသဘင်အစည်းအရုံးအဖွဲ့ဝင်တစ်ဦးက ပြောသည်။
“ဇာတ်ကမော်လမြိုင်က ဇာတ်အဖွဲ့၊ မြဝတီကိုသွားရင်း တိမ်းမှောက်တာလို့သိရတယ်”ဟု သဘင်အစည်းအရုံးအဖွဲ့ဝင်တစ်ဦးက ပြောသည်။
ထိခိုက်သူများအနက် အများစုမှာ အမျိုးသားများဖြစ်ပြီး အမျိုးသမီး ခုနစ်ဦးထက်မနည်းပါဝင်ကြောင်း၊ မြဝတီဆေးရုံတွင် ဆေးကုသမှုခံယူနေကာ အကူအညီများလိုအပ်နေကြောင်း ဒေသတွင်းလူမှုကူညီရေးအသင်းများက ပြောသည်။
Public Service Announcement
