ကရင်အမျိုးသားအစည်းအရုံး(KNU) တပ်မဟာ(၆)နယ်မြေ မြ၀တီ -ဝေါ်လေလမ်း၌ ယနေ့ အောက်တိုဘာ ၆ရက်တွင် တိုက်ပွဲဆက်လက်ဖြစ်ပွားခဲ့ပြီး စစ်ကောင်စီတပ်က သေဆုံးထိခိုက်ရှိခဲ့သည်ဟု ကော်ဘရာစစ်ကြောင်းက သတင်းထုတ်ပြန်သည်။
စစ်ကောင်စီ၏ တိုက်ခိုက်ရေးတပ်ရင်းများ ဖြစ်သည့် ခမရ(၁၀၂)၊ ခလရ(၈)၊ ခလရ(၂၀၇)တို့နှင့် KNLA တပ်ရင်း (၂၇) ကော်ဘရာပူးပေါင်းစစ်ကြောင်း ၊ တပ်မဟာစစ်ကြောင်း တပ်ခွဲ(၂)တို့ တိုက်ပွဲဆက်ဖြစ်ခဲ့ရာ စစ်ကောင်စီတပ်က လက်နက်ကြီးပစ်ကူများဖြင့် တိုက်ခိုက်ခဲ့သည်ဟုဆိုသည်။
ယနေ့ ၉နာရီမှစ၍ ၁နာရီခွဲခန့် တိုက်ပွဲဖြစ်ခဲ့ပြီး မွန်းလွဲ ၃နာရီမှစ၍ ယခု သတင်းထုတ်ပြန်သည့် ညပိုင်း အချိန်ထိတိုက်ပွဲဖြစ်ပွားနေသည်ဟု အသိပေးသည်။
တိုက်ပွဲတွင် လက်နက်ကြီးဖြင့် အပြန်အလှန်ပစ်ခတ်ခြင်း၊ ပူးပေါင်းတပ်ဖွဲ့များမှ စစ်ကောင်စီတပ်အား ဒရုန်းဖြင့် ဗုံးကြဲတိုက်ခိုက်ခြင်းတို့ လုပ်ဆောင်ခဲ့ပြီး ခြေမှုန်းရေး စစ်သည်များနှင့် မြေပြင်ထိတွေ့တိုက်ပွဲများလည်းဖြစ်ပွားနေသည်ဟု ဆိုသည်။
ပူးပေါင်းတပ်၏ တိုက်ခိုက်မှုကြောင့် စစ်ကောင်စီတပ်မှ တစ်ဦး ဒဏ်ရာရခဲ့ကြောင်း၊ ယနေ့ တိုက်ပွဲစဉ်များအတွင်း ပူးပေါင်းတပ်ဖွဲ့များဘက်မှ တော်လှန်ရေးရဲဘော် တစ်ဦးလည်း ဒဏ်ရာရခဲ့ကြောင်း ထုတ်ပြန်သည်။
မြ၀တီ – ဝေါ်လေလမ်း တောင်နီး ကျေးရွာအနီးရှိ စစ်ကောင်စီတပ်ကိုလည်း ပူးပေါင်းတပ်ဖွဲ့ကယနေ့ နေ့လည်ပိုင်း၌ တိုက်ခိုက်ခဲ့ရာ လက်ဖြောင့်စနိုက်ပါ စစ်သည်များ၏ လက်ချက်ကြောင့်
စစ်ကောင်စီဘက်မှ တစ်ဦး သေဆုံးခဲ့ကြောင်း ကော်ဘရာစစ်ကြောင်းက ထုတ်ပြန်ခဲ့ပြီး ပူးပေါင်းတပ်မှ ထိခိုက်မှုမရှိဟု အသိပေးထားသည်။
မြဝတီ – ဝေါလေလမ်းကို စစ်ကောင်စီတပ်က ထိန်းချုပ်နိုင်ရန် ယခုနှစ် ဇူလိုင်လဆန်းမှစ၍ စစ်ကြောင်းများ အကြိမ်ကြိမ်ထိုး၍ တိုက်ပွဲများ မကြာခဏဖြစ်ပွားနေသည်။ စစ်ကောင်စီတပ်က ကြည်းကြောင်းအပြင် လေကြောင်းမှပါ တိုက်ခိုက်သော်လည်း KNLA ဦးဆောင်သော ကော်ဘရာစစ်ကြောင်း၏ တန်ပြန်ခုခံစစ်ကြောင့် နယ်မြေများကို စိုးမိုးနိုင်ခြင်းမရှိဘဲ စစ်ကောင်စီတပ်မှာ သေဆုံးထိခိုက်မှုများစွာ၊ တပ်မှပြေးသူများ၊ ပြည်သူနှင့်ပူးပေါင်းပြီးCDM ပြုလုပ်သူများတိုးလာပြီး စစ်ကောင်စီတပ် အထိနာခဲ့သည်။
စစ်ကောင်စီတပ်က စစ်ကြောင်းထပ်ထိုးပါက တပ်ပျက်သည့်အထိ ချေမှုန်းခံရမည်ဖြစ်ကြောင်း ကော်ဘရာစစ်ကြောင်း ပြန်ကြားရေးတာဝန်ခံ ကိုမျိုးသူရကိုကိုက ပြောသည်။