စစ်ကိုင်းတိုင်း ဗန်းမောက်မြို့နယ်ရှိ ကြောင်လည် ကျေးရွာကို စစ်ကောင်စီတပ်က ယနေ့ နေ့လည်ပိုင်း၌ လေကြောင်းမှ ဗုံးကြဲတိုက်ခိုက်ခဲ့ကြောင်း ဒေသခံတစ်ဦးက ပြောသည်။
ဗန်းမောက်မြို့နယ်မံယူးကြီးကျေးရွာကို စစ်ကောင်စီတပ်က ယမန်နေ့ (အောက်တိုဘာ ၂၀ရက်)က ဗုံးကြဲတိုက်ခိုက်ခဲ့ရာ အမျိုးသမီး တစ်ဦးသေဆုံးပြီး ကလေးငယ်များအပါအဝင် ၅ဦးထက်မနည်း ထိခိုက် ဒဏ်ရာရရှိခဲ့သည်။
“အခု ဗန်းမောက် ကြောင်လည်မှာတော့လေကြောင်းနဲ့ထပ်တိုက်ခိုက်တယ်ပြောတယ်။ အဲဒီ ကြောင်လည်က မံယူးကြီးနဲ့ဆို ၁၅မိုင်လောက်ဝေးတယ်။ ဒီနေ့ ၁နာရီ ၁၅ လောက်မှာ ဖြစ်တာ”ဟု ဒေသခံက ပြောသည်။
လေကြောင်းတိုက်ခိုက်မှုကြောင့် အဆောက်အအုံထိခိုက်ပျက်စီးမှုရှိသည်ဟု ကြားသိရသော်လည်း လူသေဆုံးဒဏ်ရာရမှု အခြေအနေကို မသိရသေးဟု ဆိုသည်။
Public Service Announcement
စစ်အာဏာရှင်ဆန့်ကျင်ရေး လှုပ်ရှားမှု၊ ခုခံတော် လှန်မှု အားကောင်းသည့် စစ်ကိုင်းတိုင်းရှိ ကျေးရွာများကို စစ်ကောင်စီတပ်က လေကြောင်းမှ စီးနင်းတိုက်ခိုက်ခြင်း၊ တိုက်လေယာဉ်ဖြင့် ဗုံးကြဲခြင်းများ မကြာခဏ ပြုလုပ်လျက်ရှိသည်။
