ဒဏ်ရာရသူများဆေးကုသနိုင်ရေး ကြိုးပမ်းမှု စစ်ကောင်စီတပ် ပိတ်ပင်ထား၊ အလောင်းများ သယ်ယူခွင့်မပေး
ဒဏ်ရာရသူများဆေးကုသနိုင်ရေး ကြိုးပမ်းမှု စစ်ကောင်စီတပ် ပိတ်ပင်ထား၊ အလောင်းများ သယ်ယူခွင့်မပေးကချင်ပြည်နယ် ဖားကန့်မြို့နယ်အတွင်း စစ်ကောင်စီတပ်က လေကြောင်း တိုက်ခိုက်ခဲ့၍ သေဆုံးသူ ၃၅ဦးခန့်ရှိပြီး ဒဏ်ရာရသူ ၃၆ဦး ရှိကြောင်း ကချင်သတင်းရင်းမြစ်က ယနေ့(အောက်တိုဘာ ၂၄ရက်) ညနေ ၄ နာရီခန့်တွင် ပြောကြားသည်။
အောက်တိုဘာ ၂၃ရက် ညပိုင်းက ကချင်လွတ်လပ်ရေးတပ်မတော်(KIA) တပ်မဟာ(၉) ဌာနချုပ်နယ်မြေ၌ ကချင်လွတ်လပ်ရေးအဖွဲ့(KIO) နေ့ အထိမ်းအမှတ် အခမ်းအနားအကြို ဂီတပွဲပြုလုပ်နေစဉ် စစ်ကောင်စီတပ်က တိုက်လေယာဉ်ဖြင့် ဗုံးကြဲတိုက်ခိုက်ခဲ့၍ အနုပညာရှင်၊ လုပ်ငန်းရှင်များ၊ ပြည်သူများ၊ KIA စစ်ဘက်တာဝန်ရှိသူများ အပါ အဝင် သေဆုံးသူများပြားခဲ့သည်။
“ကျွန်တော်တို့ သိရသလောက် အခုလောလောဆယ် သေဆုံးတာ ၃၅ဦးလောက်ရှိတယ်။ ခန့်မှန်းပေါ့နော်။ဒဏ်ရာရတာက ၃၆ယောက်”ဟု ကချင် သတင်းရင်းမြစ်က ဖားကန့်ဒေသ လေကြောင်း တိုက်ခိုက်ခံရမှု ထိခိုက်သေဆုံး နောက်ဆုံးအခြေအနေကို ပြောပြသည်။
သေဆုံးသူနှင့် ဒဏ်ရာရသူများတွင် ပြည်သူ မည်မျှပါဝင်သည် KIA စစ်ဘက်တာဝန်ရှိသူ မည် မျှ ပါဝင်သည်ကို အတိအကျ မသိရသေးဟုဒေသခံက ပြောသည်။
Public Service Announcement
“အဆိုတော် အနုပညာအဖွဲ့လည်းပါတယ်။ နောက်ပြီး ရိုးရာအဖွဲ့တွေရောပေါ။ အဲဒီမှာ အထိမ်းအမှတ် ပွဲသဘောအနေနဲ့ ဂေါက်ရိုက်တာလေ။ ဂေါက်ရိုက်ပြီးမှ ရိုးရာဘာသာရေးအရ ဆုတောင်းပွဲလုပ်တဲ့သဘော။အဲဒီမှာ ည ဒင်နာစားတဲ့အချိန်မှာ ဖြစ်သွားတာပေါ့။ ၃၀ကျော်မှာ အရပ်သား ဘယ်နှစ်ယောက် သူတို့ (KIA)စစ်သား ဘယ်နှစ်ယောက်ဆိုတာ ကွဲကွဲ ပြားပြားမသိရသေးဘူး”ဟု ကချင်သတင်းရင်းမြစ်က ပြောသည်။
လက်ရှိတွင် ဒဏ်ရာရလူနားများအားကူညီမှုပေးရန် မြို့ပေါ်ရှိ ကူညီရေးအဖွဲ့များက ကြိုးပမ်းနေသော်လည်း စစ်ကောင်စီတပ်ကခွင့်မပြုဟု ဆိုသည်။
“သွားလာခွင့်လည်းမပေးဘူး။ အလောင်းသွားယူလို့လည်းမရဘူး။ လူနာကို ဒီဘက်မှာ ကူညီဖို့အတွက်ဆိုတာလည်းမရဘူး”ဟု ဒေသခံက ပြောသည်။
ပြည်သူလူထုအနေဖြင့် KIOက ခေါ်သည်ဖြစ်စေ ၊ စစ်တပ်က ခေါ်သည်ဖြစ်စေ ခေါ်ပါက သွားရလေ့ရှိကြောင်း အဆိုပါဒေသ အခြေအနေကို ပြောပြသည်။
“အဲဒီအချိန်မှာ မမျှော်လင့်ဘဲ လက်နက်ကြီးချပြီး သေဆုံးသွားတဲ့သူတွေ နောက်ပြီး ထိခိုက်ဒဏ်ရာရတယ်ဆိုတဲ့အခါ ကျတော့ လူသားချင်းစာနာမှုအနေနဲ့ ခေါ်ယူပြီးမှ ဆေးဝါးကုသခွင့်တော့ ပေးသင့်တာပေါ့”ဟု ကချင်ဒေသခံက ပြောသည်။
