Connect with us

Hi, what are you looking for?

LuduNwayOo

သတင်း

ဘူးသီးတောင်ရှိ စစ်ရှောင်များ ယခုလကုန်နေရပ်မပြန်ပါက ကျူးကျော်အဖြစ်သတ်မှတ်အရေးယူမည်ဟု စစ်ကောင်စီ ခြိမ်းခြောက်

စစ်ရှောင်များ ရပ်ရွာသို့ မပြန်ရန်သည့် အချက်များတွင် စစ်ကောင်စီတပ်က တိုက်ပွဲဖြစ်ပါက ရပ်ရွာများကို ပစ်မှတ်ထားတိုက်ခိုက်နေခြင်းကြောင့်လည်း ပါဝင်သည်ဟု ဆိုသည်။

(ဘူးသီးတောင်မြို့ ရန်အောင်မြေ စစ်ရှောင်စခန်းအား တွေ့ရစဥ်၊ဓာတ်ပုံ-BNA)
(ဘူးသီးတောင်မြို့ ရန်အောင်မြေ စစ်ရှောင်စခန်းအား တွေ့ရစဥ်၊ဓာတ်ပုံ-BNA)

ရခိုင်ပြည်နယ် ဘူးသီးတောင်မြို့ရှိ စစ်ဘေးရှောင်စခန်းများမှ စစ်ဘေးရှောင်များ အောက်တိုဘာ ၃၁ရက် နောက်ဆုံးထားနေရပ်ပြန်ရန် စစ်ကောင်စီ၏ မြို့နယ်ကောင်စီ ဥက္ကဋ္ဌက စစ်ရှောင်စခန်း တာဝန်ရှိသူများကို ခေါ်ယူပြောကြားသွား၍ စစ်ရှောင်များအခက်ကြုံနေကြောင်း ရခိုင်ဒေသခံက ပြောသည်။

အောက်တိုဘာ ၁၉ရက်က ပြုလုပ်သည့် စစ်ရှောင် အစည်းအဝေး၌ စစ်ကောင်စီက ထိုသို့ ပြောဆိုခဲ့ခြင်းဖြစ်သည်ဟု ရခိုင်အခြေစိုက်သတင်းဌာန Border News Agency က ဖော်ပြသည်။

ထိုသို့ စစ်ရှောင်များနေရပ်ပြန်ခိုင်းသည်ကို ကြားသိရကြောင်း၊လွန်ခဲ့သည့် နှစ်နှစ်က ဖြစ်ပွားခဲ့သည့် တိုက်ပွဲများကြောင့် စစ်ဘေးရှောင်နေရသူများပင် နေရပ်မပြန်နိုင်သေးသည့်အခြေအနေ၊ လက်ရှိ တိုက်ပွဲပြင်းထန်နေသည့် အခြေအနေများ၌ စစ်ရှောင်များကို ပြန်ခိုင်းခြင်းမှာ မဖြစ်သင့်ကြောင်း ရခိုင်နိုင်ငံရေးသမား ဦးဖေသန်းက ပြောသည်။

“ဘာလို့လဲဆိုရင် အဲဒီနေရာတွေမှာ တိုက်ပွဲတွေထပ်ဖြစ်လာနိုင်တယ်ဆိုတဲ့ စိုးရိမ်ကြောင့်ကြမှုကြောင့်။ နောက်တစ်ခုက သူတို့ နေရာတွေမှာ မိုင်းတွေ ရှိနေတယ်။ အဲဒါကြောင့် တောဘက်တောင်ဘက် မသွားရဲတော့ဘူး။ တနည်းအားဖြင့် သူတို့ရဲ့ ဘ၀ရပ်တည်ရေးအရ မိမိနေရာကို ပြန်ဖို့ ဘယ်လိုမှ မဖြစ်နိုင်တဲ့ အခြေအနေမျိုးကြောင့်ပေါ့။ ဒီဘက်က စစ်ရှောင်စခန်းတွေရဲ့ အကူအညီ အထောက် အပံ့တွေကိုလည်း စစ်ကောင်စီက ဖြတ်တောက်ထားတာရှိတယ်”ဟု ဦးဖေသန်းက ပြောသည်။

Public Service Announcement

Public Service Announcement

လက်ရှိတွင် စစ်ရှောင်များကို အကူအညီ သေးသည့် အဖွဲ့အစည်းများ အကူအညီမပေးနိုင်စေရန် စစ်ကောင်စီက ပိတ်ပင်ထားသကဲ့သို့ အလှူရှင်များ အလှူငွေကောက်ခံခြင်း၊လှူဒါန်းခြင်းတို့ကိုလည်း တားမြစ်ထားသည်ဟု ဆိုသည်။

“စစ်ရှောင်တွေဆိုတာ သေဘေးကိုကြောက်လို့ လက်နက်ကြီးထိမှန်မှာ ကြောက်လို့ထွက်ပြေးလာတာဖြစ်တယ်။ ဒီလို လူတွေအတွက် အသက်ရှင်ရပ်တည်ရေးက စစ်ရှောင်စခန်းတွေပဲရှိတယ်။ အဲဒီ စစ်ရှောင်စခန်းတွေမှာ စုပေါင်းနေထိုင်ခြင်းအားဖြင့် ပြင်ပ အကူအညီတွေ ရနိုင်တဲ့ မျှော်လင့်ချက်ပေါ့။ ပထမ မျှော်လင့်ချက်က စစ်ဘေးနဲ့ဝေးရာ နေရာမှာ ရပ်တည်ခွင့်ပေါ့။ အဲဒီလိုဟာလေးနဲ့ သူတို့ အသက်ရှင်သန်နိုင်အောင် ကုတ်ကပ်ပြီးနေကြတာဖြစ်တယ်” ဟု ဦးဖေသန်းက ပြောသည်။

စစ်ရှောင်များ ရပ်ရွာသို့ မပြန်ရန်သည့် အချက်များတွင် စစ်ကောင်စီတပ်က တိုက်ပွဲဖြစ်ပါက ရပ်ရွာများကို ပစ်မှတ်ထားတိုက်ခိုက်နေခြင်းကြောင့်လည်း ပါဝင်သည်ဟု ဆိုသည်။

“မနေရဲဘူးဆိုတာက တခါတခါ စစ်ကောင်စီတပ်တွေက ရည်ရွယ်ချက်ရှိရှိနဲ့ ရွာတွေကို ပစ်လာတယ်ဆိုတာလည်း အားလုံးသိတဲ့အတိုင်းပဲ။ သတင်းတွေနေ့တိုင်းကြားနေရတယ်။တိုက်ပွဲဖြစ်တာ တစ်နေရာ ပစ်တာတစ်နေရာဆိုတာ။ ရပ်ရွာတွေကို လှမ်းပစ်တာ။ အဲဒီလို အခြေအနေအမှာ အဲဒီရွာတွေကို ပြန်ပါဆိုတာ ကတော့ စစ်ဘေးရှောင်တွေကို သေတွင်းကို ပို့တာပဲ”ဟု ဦးဖေသန်းက ပြောသည်။

ဘူးသီးတောင်မြို့နယ်တွင် စစ်ဘေးရှောင်စခန်း ၄ခုရှိပြီး အိမ်ထောင်စု ၇၅၀ ကျော် လူဦးရေ ၃ထောင်ကျော်ရှိကြောင်း BNAက ဖော်ပြထားသည်။

ဆက်စပ်သတင်းများ

သတင်း

CNA အပါအဝင် ချင်းပူးပေါင်းတပ်ဖွဲ့သည် တွန်းဇံ၊ ရေဇွာ၊ လိုင်လင်းပီ၊ ရိဒ်ခေါ်ဒါမြို့များကို တိုက်ခိုက်သိမ်းပိုက်ထားပြီးဖြစ်သည်။

သတင်း

ရန်ကုန်တိုင်း စစ်ကြောရေးတာဝန်ခံ ဒုဗိုလ်မှူးကြီးသန်းထွဋ်ကိုလည်း တောင်ငူခရိုင်တပ်ရင်း ၃၅၀၁က ရန်ကုန် - နေပြည်တော် အမြန်လမ်း မိုင်တိုင်(၁၆၁)အနီးတွင် ၂၀၂၃ ဇန်နဝါရီ၂၂ ရက်က ပစ်ခတ်ရှင်းလင်းခဲ့သည်။

သတင်း

မံစီမြို့နယ်ရှိ တပ်ရင်း ၂ခုမှ အင်အား ၁,၅၀၀ခန့်ကိုလည်း KIA ပူးပေါင်းတပ်က တိုက်ခိုက်နေရခြင်းဖြစ်ကြောင်း သတင်းရင်းမြစ်က ပြောထားသည်။

သတင်း

ဟံသာဝတီရွာအတွင်း တပ်စွဲထားသည့် စစ်ကောင်စီစစ်ကြောင်းမှူးကိုလည်း အချိန်းအပြောင်းပြုလုပ်သွားကြောင်း သတင်းရရှိသည်။