စစ်ကိုင်းတိုင်းအခြေစိုက် ပြည်သူ့ကာကွယ်ရေးတပ်ဖွဲ့များက အဖွဲ့အချင်းချင်း လက်နက် ပြန်လည်ငှားရမ်းကာ စစ်ကောင်စီတပ်အား ခုခံတိုက်ခိုက်နေပြီး လိုအပ်သည့်လက်နက်များဝယ်ယူရန် ကမ်ပိန်းပြုလုပ်နေကြောင်း မုံရွာခရိုင်နှင့် ယင်းမာပင်ခရိုင်အခြေစိုက် ပြည်သူ့ကာကွယ်ရေးတပ်ဖွဲ့နှစ်ဖွဲ့က ပြောသည်။
ခေတ်မီလက်နက်မရှိ၍ တိုက်ပွဲရှိပါက မဟာမိတ်အဖွဲ့များထံမှ မောင်းပြန်သေနတ်များငှားရမ်းကာ စစ်ကောင်စီအားခုခံတိုက်ခိုက်နေကြောင်း၊ လိုအပ်သည့် AK-47နှစ်လက်စာ ကျပ်သိန်း၂၆၀ အတွက် ကမ်ပိန်းပြုလုပ်ကာ ရှာဖွေနေကြောင်း မုံရွာခရိုင်အခြေစိုက် Monywa Lightning ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ခံက ပြောသည်။
“ကျွန်တော်တို့မှာ ခေတ်မီလက်နက် တူတူတန်တန်ရယ် ဆိုပြီးမရှိတဲ့အတွက် ကျွန်တော်တို့ ထုတ်လုပ်ရေးကနေထုတ်လုပ်တဲ့ အခွံထိုးသေနတ်ကိုပဲ အားပြုတော်လှန်တိုက်ပွဲဝင်နေကြရတာ ဖြစ်ပါတယ်ခင်ဗျ။ Mission တစ်ခုဖော်ဆောင်မယ်ဆိုရင်လည်း ကျွန်တော်တို့ မဟာမိတ်ညီနောင်တွေ ဆီကနေ လိုအပ်တဲ့မောင်းပြန်တွေ ငှားရမ်းပြီး ပွဲကနေကြရတာဖြစ်ပါတယ်”ဟု Monywa Lightning အဖွဲ့ ပြန်ကြားရေးတာဝန်ခံက ပြောသည်။
ယင်းမာပင်ခရိုင်အခြေစိုက် အမိမြေတော်လှန်ရေးတပ်ဖွဲ့ကလည်း လိုအပ်သည့်လက်နက်များအတွက် မဲလက်မှတ်တစ်စောင်ကို (၅,၀၀၀) ကျပ်ဖြင့် ရောင်းချပေးနေပြီး ကံစမ်းမဲအစီအစဉ်၌ လက်တော့ပ်၊ ဖုန်းနှင့် ပါဝါဘဏ်များ မဲဖောက်ပေးမည်ဟု အမိမြေတော်လှန်ရေးတပ်ဖွဲ့ပြန်ကြားရေးတာဝန်ခံက ပြောသည်။
Public Service Announcement
“အမိမြေတပ်ဖွဲ့အနေနဲ့ အာဏာရှင်စနစ် ပိုမိုထိရောက်အောင် တော်လှန်နိုင်ဖို့ ဗြောက်အကြီးတစ်လက် ဝယ်ယူနိုင်မဲ့ ကမ်ပိန်းလေးဖြစ်ပါတယ်။ ဗြောက်အမျိုးအစားကိုတော့ တိုက်ပွဲဝင်ရင်း ချပြပေးသွားပါ့မယ်ဗျ။”ဟု အမိမြေတော်လှန်ရေးတပ်ဖွဲ့ပြန်ကြားရေးတာဝန်ခံက ပြောသည်။
အဆိုပါ ကမ်ပိန်းများအတွက် အမိမြေတော်လှန်ရေးတပ်ဖွဲ့နှင့် Monywa Lightning ပြည်သူ့ကာကွယ်ရေးတပ်ဖွဲ့များ၏ Facebook Pageစာမျက်နှာသို့ ဆက်သွယ်နိုင်ကြောင်း အသိပေးထားသည်။
