အာဏာသိမ်းတဲ့နေ့ကတည်းက ဖမ်းဆီးထားတဲ့ အသက် ၈၄ နှစ်အရွယ် NLD စီမံဘဏ္ဍာဝန်ကြီး ဦးစိုးဝင်းကို စစ်ကောင်စီဟာ မနေ့က ရမည်းသင်းထောင်ကနေ ပြန်လွတ်ပေးလိုက်ပါတယ်။
NLD အစိုးရအဖွဲ့ဝင်တွေထဲ အသက်အကြီး ဆုံးဖြစ်တဲ့ ဝန်ကြီး ဦးစိုးဝင်းဟာ အူမကြီးကင်ဆာဝေဒနာ ခံစားနေရသူလည်းဖြစ်ပါတယ်။
ပြီးခဲ့တဲ့ စက်တင်ဘာလကုန်ပိုင်းက ဝန်ကြီး ဦးစိုးဝင်း ကို အစိုးရ လျှို့ဝှက်အက်ဥပဒေ နဲ့ စစ်ကောင်စီဟာ ထောင် ၃ နှစ်ချထားပါတယ်။
ဖမ်းခံရချိန် ဝန်ကြီးဦးစိုးဝင်း ဟာ အူမကြီး ကင်ဆာဝေဒနာကို နေပြည်တော်ကုတင် တစ်ထောင်ဆေးရုံမှာ တက်ရောက်ကုသမှုခံယူခဲ့ရပါသေးတယ်။
Public Service Announcement
ဖမ်းဆီးပြီး ၁၉ လကျော် ကြာချိန်မှာတော့ ဝန်ကြီး ဦးစိုးဝင်းကိုစစ်ကောင်စီကပြန်လွှတ်ပေးလိုက်တာပါ။
ဝန်ကြီး ဦးစိုးဝင်းပြန်လွတ်လာတာကိုလည်း NLD ပါတီဝင်အချို့က လူမှုကွန်ရက်မှာရေးသားအသိပေးထားကြပါတယ်။
NLD အစိုးရ လက်ထက် ၂၀၁၈ ခုနှစ်မှာ ဦးစိုးဝင်းဟာ စီမံဘဏ္ဍာဝန်ကြီးအဖြစ် တိုင်းပြည်အတွက် တာဝန်ထမ်းဆောင်ခဲ့ပါတယ်။
ဦးစိုးဝင်းဟာ ရင်းနှီးမြှုပ်နှံမှုနဲ့ဘဏ္ဍာရေးဆိုင်ရာအကြံပေးအဖြစ် နှစ်ပေါင်း ၃၀ ကျော်အတွေ့အကြံရှိသူဖြစ်ပြီး ဝန်ကြီးအဖြစ် တာဝန်ယူချိန် တည်ငြိမ်ပြီး ဖွံ့ဖြိုးတိုးတက်အောင် နိုင်ငံစီးပွားရေးကို ပဲ့ကိုင်ခဲ့သူတစ်ဦးဖြစ်ပါတယ်။
