ခင်ဦးတွင် စစ်ဘေးရှောင်သောင်းချီရှိနေပြီး ရာသီအကူအကူး‌ပြောင်းကြောင့် ဖျားနာမှုဖြစ်၊ ဆောင်းဝင်လာ၍ စောင်နှင့်အနွေးထည်များလိုအပ်နေ

စစ်ကိုင်းတိုင်း၊ ခင်ဦးမြို့နယ်တွင် စစ်ဘေးရှောင်သောင်းချီရှိနေပြီး ရာသီဥတုအကူးအပြောင်း၌ ဖျားနာမှုများ ဖြစ်ပွားနေကြောင်း ဒေသတွင်းသတင်းရင်းမြစ်များက ပြောသည်။

စစ်ကောင်စီတပ်၏ စစ်ကြောင်းထိုးမီးရှို့ဖျက်ဆီးမှုများကြောင့် ခင်ဦးမြို့နယ်တွင် အမြဲတမ်း စစ်ဘေးရှောင် ကျေးရွာ (၁၅) ရွာခန့်ရှိပြီး လူဦးရေတစ်သောင်းခန့် ထွက်ပြေးတိမ်းရှောင်နေရကြောင်း၊ ရာသီဥတု အနည်းငယ်အေးလာ၍ စစ်ဘေးရှောင်အချို့ ဖျားနာကိုက်ခဲမှုဝေဒနာများ ခံစားနေရကြောင်း ခင်ဦးမြို့နယ် ဒေသခံကာကွယ်ရေး မဟာမိတ်အင်အားစု-KURDAF ပြန်ကြားရေးတာဝန်ခံက ပြောသည်။

“ဆောင်းဝင်တော့မှာဖြစ်လို့ အနွေးထည် ၊ စောင်များ လိုအပ်ပါတယ်။ ရာသီအကူးအပြောင်းမှာ ဖျားနာတာမျိုးတွေ ရှိပါတယ်။”ဟု KURDAF ပြန်ကြားရေးတာဝန်ခံက ပြောသည်။

စစ်ဘေးရှောင်များအား KURDAF မဟာမိတ် အင်အားစု အဖွဲ့ဝင် KSO ဆေးတပ်သားများကလည်း နှစ်ပတ်တစ်ကြိမ် အခမဲ့ ဆေးကုသပေးနေသည်ဟု ၎င်းက ပြောသည်။

Public Service Announcement

စစ်ကိုင်းတိုင်းတွင် စစ်တပ်အာဏာသိမ်းပြီးချိန်မှ အောက်တိုဘာ၂၄ ရက်အထိ နေရပ်စွန့်ခွာသူဦးရေ ၆ သိန်းကျော်(၆၁၂,၄၀၀)ရှိနေပြီး တစ်နိုင်ငံလုံး၌ အများဆုံးနေရပ်စွန့်ခွာမှုဖြစ်ကြောင်း ကုလသမဂ္ဂလူသားချင်းစာနာမှုဆိုင်ရာညှိနှိုင်း‌ရေးရုံး (OCHA) က အောက်တိုဘာ ၂၇ ရက်တွင် ထုတ်ပြန်ထားသည်။