ပေါက်မြို့နယ်မြောက်ပိုင်းကို စစ်ကောင်စီတပ်က ယနေ့နံနက်ပိုင်းတွင် စစ်ကြောင်းထိုးလာ၍ ကျေးရွာများရှိ ပြည်သူများထွက်ပြေးတိမ်းရှောင်နေရပြီး နေအိမ်အချို့ကို စစ်ကောင်စီတပ်က မီးရှို့ဖျက်ဆီးနေကြောင်း ဒေသခံများကပြောသည်။
စစ်ကောင်စီတပ်က အောက်တိုဘာ ၃၀ ရက်ကတည်း ပေါက်မြို့နယ်၊ ပျူစောထီးများ ခြေကုတ်ယူထားသည့် ဝက်ပုတ်ရွာမှ အင်အား ၇၀ခန့်ဖြင့် စစ်ကြောင်းထိုးနေလာပြီး ယနေ့မနက်ပိုင်း(နိုဝင်ဘာ ၁ရက်) ၈နာရီခွဲခန့်က လက်ခုပ်ပင်ရွာသို့ စစ်ကြောင်းထိုး၍ မီးရှို့နေကြောင်း ဒေသခံကာကွယ်ရေးတပ်ဖွဲ့ဝင်အချို့ကလည်းပြောသည်။
“ထိတွေ့တိုက်ပွဲဖြစ်ဖို့ အခြေအနေများနေပါတယ်။ မြေပြင်အခြေအနေက အသေးစိပ်မသိရသေးဘူး”ဟု အနောက်ပိုင်းတိုင်း တပ်မဟာ ၇ လက်အောက်ခံ တပ်ရင်းမှ တာဝန်ရှိသူတစ်ဦးကပြောသည်။
စစ်ကောင်စီတပ်သည် ယမန့်နေ့(အောက်တိုဘာ ၃၁ ရက်) ညက ဆေးပင်ကြီးရွာတွင် ညအိပ်ခဲ့ပြီး ယနေ့မနက်ပိုင်းတွင် ဒေသခံကာကွယ်ရေးတပ်များနှင့်တိုက်ပွဲဖြစ်ပွားနေသည်ဟု ဒေသခံတစ်ဦးကပြောသည်။
Public Service Announcement
စစ်ကောင်စီတပ်၏ ထိုးစစ်ကြောင့် ပေါက်မြို့နယ်၊ မြောက်ပိုင်းရှိ ကျေးရွာအချို့မှာ ပြည်သူများ ညတွင်းချင်းထွက်ပြေးတိမ်းရှောင်နေရသည်ဟု ဒေသခံများကပြောသည်။
