ပြည်သူ့ကာကွယ်ရေးရဲဘော်များ၏ မိုင်းအန္တရာယ်ကို ကြောက်လန့်နေသည့် စစ်ကောင်စီတပ်က ၎င်းတို့၏ အရာရှိတစ်ဦးလုံခြုံရေးအတွက် အင်အား ၈၀ခန့်အထိ အသုံးပြုကာမြို့တွင်း၌ ခြေလျင်စစ်ကြောင်းဖြင့် သွားလာနေရကြောင်း ကလေးပြည်သူ့ကာကွယ်ရေးတပ်ဖွဲ့မှ ရဲဘော်တစ်ဦးက ပြောသည်။
ကလေးမြို့ GTC ကျောင်းဝင်းအတွင်း စစ်ကောင် စီတပ်က ယနေ့(နိုဝင်ဘာ ၃ရက်) နံနက်ပိုင်းတွင် အင်းအားအများအပြားဖြင့် စုဝေးနေခဲ့သည်။ ပုံမှန်အခြေအနေမဟုတ်၍ စုံစမ်းကြည့်သည့်အခါ စစ်ကောင်စီအရာရှိတစ်ဦး GTC ဝင်းအတွင်း လာရောက်၍ လုံခြုံရေးယူပေးခြင်းဟု သိရကြောင်း ကလေးပြည်သူ့ကာကွယ်ရေးတပ်ဖွဲ့မှ ရဲဘော်တစ်ဦးက ပြောသည်။
“စခတွေက သူတို့အရာရှိတစ်ယောက်ကို လာပို့တာ အင်အား ၈၀လောက်သုံးထားတယ်။ သူတို့အလှည့်ကျ တော်တော် ကြောက်တတ်ကြတာပဲ။ အခုတော့ GTC ဝင်းထဲမှာ စုနေကြတယ်” ဟု ပြည်သူ့ကာကွယ်ရေးရဲဘော်တစ်ဦးကပြောသည်။
စစ်ကောင်စီစစ်ကြောင်း စုဝေးနေသည်ဟူသော သတင်းကြောင့် ကလေးမြို့ပတ်ဝန်းကျင်ရှိ စစ်ဘေးရှောင် ကျေးရွာအချို့သည် နေရာထပ်မံပြောင်းရွှေ့ရန် ပြင်ဆင်နေကြသည်။
Public Service Announcement
” GTCဂိတ်ကနေ ပိတ်ထားတယ်။ မြို့ထဲကိုတက် လာတဲ့သူတွေကို အကုန်ပြန်လှည့်ခိုင်းနေတယ်။ ပုံစံမကျရင် ပစ်သတ်မယ်လို့ ခြိမ်းခြောက်တယ်။ ဒီစစ်ကြောင်းဘယ်ကို သွားမလဲဆိုတာ ပြည်သူအချင်းချင်းသတင်းပေးကြပါ”ဟု ကလေးမြို့ခံတစ်ဦးက ပြောသည်။
ကလေးမြို့တွင် အောက်တိုဘာ ၃၁ရက်ကစစ်ကောင်စီစစ်ကြောင်း မိုင်းဆွဲတိုက်ခိုက်ခံရပြီး အရာရှိအပါအဝင် သုံးဦးသေဆုံးခဲ့သည်။
ကလေးမြို့ GTC ကျောင်းဝင်းအတွင်းမှ စစ်ကောင်စီစစ်ကြောင်းသည် အင်းအား ၁၅၀ခန့်အထိရှိလာပြီး ယင်းနေရာတွင် စခန်းချမည်လား၊ သို့မဟုတ် မည်သည့်နေရာ စစ်ကြောင်းထွက်မည်ကို မသိရသေးပေ။
