ကရင်အမျိုးသားအစည်းအရုံး(KNU)တပ်မဟာ(၆)နယ်မြေ မြဝတီ-ဝေါ်လေ ကားလမ်းတွင် စစ်ကောင်စီတပ်ကို ယနေ့ နိုဝင်ဘာ ၉ရက် နေ့လည်ပိုင်းမှ ထိုးစစ်ဆင်တိုက်ခိုက်ခဲ့ကြောင်း ကရင်အမျိုးသားလွတ်မြောက်ရေးတပ်မတော်(KNLA) တပ်ရင်း(၂၇) ကော်ဘရာစစ်ကြောင်းကအသိပေးထုတ်ပြန်သည်။
အဆိုပါဒေသရှိ ဆုံဆည်းမြိုင်ကျေးရွာမှ တောင်နီ၊ သေ့ဘော့ဘိုး စသည့်ကျေးရွာများအနီးသို့ ကျူးကျော်နေသော အကြမ်းဖက်စစ်ကောင်စီ၏ တပ်မ (၄၄) လက်အောက်ခံ၊ နည်းဗျူဟာ (၄၄၃) ၏ အင်အား (၁၅၀)ခန့်အား နယ်မြေ လုံခြုံရေး ဆောင်ရွက်နေသော ကော်ဘရာစစ်ကြောင်းနှင့် တပ်မဟာ လုံခြုံရေးစစ်ကြောင်း တပ်ခွဲ (၂) ပူးပေါင်းတပ်ဖွဲ့များက ထိုးစစ်ဆင်တိုက်ခိုက်ခဲ့ခြင်းဖြစ်သည်ဟုဆိုသည်။
ယနေ့ ဖြစ်ပွားသော တိုက်ပွဲအတွင်း နှစ်ဖက် အပြန်အလှန် လက်နက်ကြီး ၊လက်နက်ငယ်များဖြင့် ပြင်းပြင်းထန်ထန် ပစ်ခတ်တိုက်ခိုက်ခဲ့ကြသည်ဟုဆိုသည်။
တိုက်ပွဲအတွင်း စစ်ကောင်စီတပ်ဘက်မှ ထိခိုက်သေဆုံးမှုအား အတိအကျ သိရှိနိုင်ရန် စစ်မြေပြင်သတင်း စုံစမ်းဆဲ ဖြစ်ကြောင်း၊ ပူးပေါင်းတပ်ဖွဲ့မှ ထိခိုက်ကျဆုံးမရှိကြောင်း ဖော်ပြထားသည်။
Public Service Announcement
ဆုံဆည်းမြိုင်ကျေးရွာတွင် အခြေပြုထားသော အကြမ်းဖက်စစ်ကောင်စီက ပစ်ခတ်လိုက်သော (၁၂၀) မမ လက်နက်ကြီး ကျရောက်ပေါက်ကွဲ၍ သေ့ဘော့ဘိုးကျေးရွာအတွင်းရှိ ဌာနေတိုင်းရင်းသားများ၏ နေအိမ်အချို့ ထိခိုက်ပျက်စီးခဲ့ရသည်ဟုဆိုသည်။
ထို့အပြင် ယမန်နေ့ညပိုင်းကလည်း မြွေသုံးကောင် ဘုရားကုန်းတွင် အခြေပြုထားသော အကြမ်းဖက်စစ်ကာင်စီက (၁၂၂) မမ (၁၂)လုံးတွဲ အတွဲလိုက်ပစ်ဒုံးဖြင့်ပစ်ခတ်တိုက်ခိုက်ခဲ့ကြောင်း ကော်ဘရာစစ်ကြောင်းက ထုတ်ပြန်သည်။
