▪︎တိုက်ပွဲများမကြာခဏဖြစ်နေပြီးစစ်ရေးတင်းမာနေ
စစ်ကောင်စီတပ်က အိန္ဒိယနယ်စပ်မှလက်နက်များသယ်ယူမည့်သတင်းကြောင့် ကလေး-တမူး အာရှလမ်းမကြီးကို ဒေသခံပြည်သူ့ကာကွယ်ရေးတပ်ဖွဲ့များကတစ်ပါတ်ပိတ်ထားပြီး တိုက်ပွဲများမကြာခဏ ဖြစ်ပွားကာစစ်ရေးတင်းမာနေကြောင်း တမူးပြည်သူ့ကာကွယ်ရေးတပ် တပ်ရင်း(၃ )မှတာဝန်ရှိသူကပြောသည်။
စစ်ရေးတင်းမာကာ အချိန်မရွေးတိုက်ပွဲဖြစ်ပွားနိုင်သောအခြေအနေကြောင့် ကလေး-တမူးလမ်းမကြီးကိုတမူး PDF တပ်ရင်း( ၃)က နိုဝင်ဘာ ၁၂ ရက်မှစ၍ ၁၉ ရက်အထိ့ပိတ်ထားကြောင်းထုတ်ပြန်ထားသည်။
“(စစ်ကောင်စီတပ်က) အင်အားတိုးတာထက် ကျွန်တော်နယ်မြေကို ဖိပြီး ပစ္စည်းသယ်ဖို့ လမ်းကြောင်းဖောက်ချင်တဲ့ သဘောပါဗျ”ဟု PDF(တမူး) တပ်ရင်း-၃ တာဝန်ရှိသူကပြောသည်။
ယခုရက်ပိုင်းတွင် စစ်ကောင်စီတပ်က ၁၂ ဘီးကားများအပါအဝင် အနည်းဆုံး ကားစီ၁၀ စီးကို ပစ္စည်းများသယ်ယူရန်ဖမ်းဆီးထားပြီး ကုန်တင်ကားသမားများလည်းထွက်ပြေးနေရသည်ဟု ဒေသခံများကပြောသည်။
Public Service Announcement
တမူးမြို့တွင် နိုဝင်ဘာလ ၁၃ရက်မှစ၍တိုက်ပွဲများမကြာခဏဖြစ်နေပြီး စစ်ကောင်စီတပ်က စစ်လက်နက်ပစ္စည်းများ သယ်ယူရန် ကြိုးစားနေသဖြင့်တိုက်ပွဲများဖြစ်ပွားနေခြင်းဖြစ်ကြောင်းPDFများကပြောသည်။
“အိန္ဒိယကပို့တဲ့လက်နက်တွေ တမူးကိုရောက်နေတယ်ဗျ။ လက်နက်ကြီးတွေလို့ပဲ သိထားတယ်။ အရပ်သားကားတွေကို ချောဆွဲထားပြီး သယ်ဖို့ကြိးစားနေတယ်” ဟုPDFတစ်ဦးကပြောသည်။
“လက်နက်တွေကရုရှားကနေပို့ထားတာရောက်နေတာကြာပြီ။ အကြီးစားကြီးတွေဗျ။ မနေ့က(နိုဝင်ဘာ ၁၄)တော့ရအောင်သယ်မယ်ဆိုတာမျိုးနဲ့ ပစ်ခတ်ပြီး ထွက်တာ။ ဒါပေမယ့် ဒီကောင်တွေတမူးနယ်ထဲကနေတော့ ထွက်လို့မရဘူး”ဟုအခြားPDFတစ်ဦးကလည်းပြောသည်။
အိန္ဒိယမှနယ်စပ်အတိုင်းသွင်းလာပြီး တမူးမှ ကလေးမြို့သို့စစ်ကောင်စီက ကားအစီးရေများစွာဖြင့်သယ်ယူမည့်ပစ္စည်းများမှာ မည်သည့်ပစ္စည်းများဖြစ်သည်ကို People’s Spring ကသီးခြားအတည်မပြုနိုင်ပါ။
နိုဝင်ဘာလ၁၄ရက်ကတမူးမြို့အာရှလမ်းမကြီးဝန်းကျင်တွင်တိုက်ပွဲပြင်းထန်ခဲ့ပြီး လက်နက်ကြီးထိမှန်၍ ပြည်သူ့ကာကွယ်ရေးရဲဘော်တစ်ဦးကျဆုံးခဲ့ကာ သုံးဦးဒဏ်ရာရခဲ့သည်။စစ်ကောင်စီဘက်မှလည်း ၅ဦးထက်မနည်းသေဆုံးသည်ဟု တမူးမြို့ ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးကပြောသည်။
ယနေ့(နိုဝင်ဘာလ ၁၅ရက်)တွင်လည်း တမူး-ကလေး အာရှလမ်းမကြီးအတိုင်း စစ်ကောင်စီတပ်ကားတန်းထွက်ခွာရန် နံနက်ပိုင်းကတည်းကပြင်ဆင်နေပြီး စစ်ရေးတင်းမာနေကြောင်း ဒေသခံများကပြောသည်။
“(PDFတွေက) ဘယ်ကားမှ အသွားမခံဘူး။ တိုက်ပွဲအကြီးအကျယ်ဖြစ်မယ် အရိပ်အယောင်တွေမြင်နေရတယ်”ဟု တမူးမြို့ခံတစ်ဦးကပြောသည်။
ကားလမ်းပိန်သည်မှာ ၄ ရက်ရှိလာသောအခါတမူးမြို့တွင် စက်သုံးဆီပြတ်လပ်နေသည်ဟု ဒေသခံများကပြောသည်။
ထို့ကြောင့် တမူးမြို့တွင် စက်သုံးဆီဈေးမြင့်တက်နေပြီး တစ်လီတာကို ကျပ် ၅၀၀၀ ကျော်အထိမြင့်တက်နေသည်ဟုလည်း ဒေသခံများကပြောသည်။
မြို့ခံတစ်ဦးက”လမ်းတွေပိတ်ထားတော့ဆီဆိုင်တွေက ဆီမထုတ်ရောင်းရဲကြဘူး။ အကုန်လုံးကြောက်လန့်နေတယ်”ဟု ပြောသည်။
“ပြည်သူတွေလဲ ဒုက္ခရောက်သလို ကျတော်တို့လဲ ပြည်သူတွေထိခိုက်မှာကို ပြန်ကြည့်ရတော့ အရမ်းအခက်တွေ့ပါတယ်ဗျ”ဟု တမူးPDF တပ်ရင်း (၃)မှ တာဝန်ရှိသူကပြောသည်။
ပြည်သူလူထုအနေဖြင့် စစ်ကောင်စီတပ်၏ အသုံးချခံမဖြစ်အောင်ဂရုစိုက်ပေးကြရန်လည်း အထက်ပါတာဝန်ရှိသူကမေတ္တာရပ်ခံပြောသည်။
အိန္ဒိယ-မြန်မာနယ်စပ်ဂိတ်ဖြစ်သည့် တမူးနယ်စပ်ဂိတ်ကိုလည်း နိုဝင်ဘာ ၁၅ ရက်မှ စတင်ပြီး ၃လကြာ ပိတ်မည်ဖြစ်ကြောင်း အိန္ဒိယ၊ မဏိပူရပြည်နယ်အစိုးရက ထုတ်ပြန်ထားသည်။
