စစ်ကောင်စီတပ် သေဆုံးမှုရှိနိုင်ဟုပြော
စစ်ကောင်စီတပ် သေဆုံးမှုရှိနိုင်ဟုပြောမွန်ပြည်နယ် ရေးမြို့နယ်အခြေစိုက် စစ်ကောင်စီ၏ ခမရ(၅၈၆) တပ်ရင်းကို ယနေ့ တိုက်ခိုက်ခဲ့ကြောင်း ရေးဘီလူးအဖွဲ့ခေါင်းဆောင်က ပြောသည်။
“ဒီနေ့လည် ၁၂နာရီခွဲလောက်မှာ ၅၈၆ တပ်ရင်းကို(၄၀)မမနဲ့ ဝင်ပစ်တယ်။ ပြီးတော့ M4 အငယ်လေးတွေ သုံးပြီး ဝင်ရောက်စီးနင်းတယ်ပေါ့ ။ဒါပေမဲ့ တပ်ထဲအထိတော့ မရောက်ဘူး။ အပြန်အလှန် ပစ်ခတ်မှုတော့ မဖြစ်ဘူး။ ကျနော်တို့ အရင်လက်ဦးမှုရတော့ ကျနော်တို့ ပစ်ပြီးတော့ မြို့ထဲမှာ ဖြစ်နေတော့ ပြန်ပြီး ဆုတ်လမ်းအတွက် ပြန်ရာပြီး တပ်ပြန်ဆုတ်ခဲ့တယ်”ဟု ရေးဘီလူးအဖွဲ့ ခေါင်းဆောင်က ပြောသည်။
အဆိုပါ တိုက်ခိုက်မှုကြောင့် စစ်ကောင်စီတပ်မှ ထိခိုက်သေဆုံးရှိနိုင်သည်ဟု ၎င်းက ဆိုသည်။
စစ်ကောင်စီတပ်မှ သေဆုံးမှုရှိမရှိကို လတ်တလော အတည်မပြုနိုင်သေးသော်လည်း စစ်ကောင်စီတပ်မှ လေးဦး ပြင်းထန်စွာဒဏ်ရာရရှိခဲ့သည်ဟု ရေးဘီလူးအဖွဲ့ခေါင်းဆောင်က ပြောသည်။
Public Service Announcement
ရေးဘီလူးအဖွဲ့သည် ရေးမြို့နယ်အတွင်းရှိ စစ်ကောင်စီတပ်ရင်းတပ်ဖွဲ့များ၊ စစ်ကောင်စီတပ်စွဲရာနေရာများ၊ ရဲများနှင့် စစ်ကောင်စီ သတင်းပေးဒလန်များကို တိုက်ခိုက်မှု မကြာခဏ လုပ်ဆောင်နေသည့် အဖွဲ့ဖြစ်သည်။
ရေးဘီလူးအဖွဲ့၏ တိုက်ခိုက်မှုကြောင့် ပြီးခဲ့သည့် အောက်တိုဘာလက ရေးမြို့နယ် ခေါဇာရဲစခန်းမှ စခန်းမှူးအပါအဝင် ရဲတပ်သား သုံးဦးသေဆုံးခဲ့ပြီးလက်နက်ခဲယမ်းများကိုလည်း သိမ်းဆည်းရရှိခဲ့သည်။
