ကချင်ပြည်နယ် ဖားကန့်မြို့တွင် စစ်ကောင်စီယာဉ် မိုင်းဆွဲတိုက်ခိုက်ခံရပြီး နှစ်ဦးထက်မနည်းသေဆုံးပြီးနောက် ယနေ့ညပိုင်းတွင် ကချင်လွတ်လပ်ရေးတပ်မ တော်(KIA)၊PDF ပူးပေါင်းတပ်ဖွဲ့နှင့် စစ်ကောင်စီတပ်တို့ တိုက်ပွဲဖြစ်ပွားနေသည်။
ဖားကန့်မြို့နယ် စပေါ့ကျေးရွာအနီးတွင် စစ်ကောင်စီတပ်ဖွဲဲ့ဝင် ငါးဦးလိုက်ပါလာသောယာဉ်အား KIA၊PDF ပူးပေါင်းတပ်ဖွဲ့က ယနေ့(နိုဝင်ဘာလ ၂၃ရက်)ညနေ ၄နာရီခန့်တွင် မိုင်းဆွဲတိုက်ခိုက်ခဲ့သည်။ ကားပေါ်ပါ ငါးဦးအနက် နှစ်ဦးသေဆုံးပြီး သုံးဦးဒဏ်ရာရခဲ့သည်ဟု ဒေသခံများက ပြောသည်။
မိုင်းဖောက်ခွဲတိုက်ခိုက်ခံရသည့်နေရာသို့ စစ်ကောင်စီတပ်ရောက်ရှိလာပြီး ထိပ်တိုက် တိုက်ပွဲဖြစ်ခဲ့ကြောင်း ဖားကန့်မြို့ ပြည်သူ့ကာကွယ်ရေးတပ်ဖွဲ့နှင့် နီးစပ်သူတစ်ဦးက People’s Spring သို့ ပြောသည်။
“မိုင်းခွဲတိုက်ခိုက်တာမှာ စခ နှစ်ကောင်သေတယ်။ သုံးဦးဒဏ်ရာပြင်းတယ်။ အဲ့ဒီနားမှာ ကလေးတေ(ပြည်သူ့ကာကွယ်ရေးရဲဘော်များ) ရှိနေချိန် စခတွေရောက်လာပြီး တိုက်ပွဲဖြစ်တယ်။ ညမှောင်ကာနီးမှာ စစ်တပ်ကုန်းကနေ လက်နက် ကြီးနဲ့ပစ်လို့ သောင်းကော့ရွာထဲကို လက်နက်ကြီးကျပြီး အခု အိမ်အချို့မီးလောင်နေပါတယ်”ဟု ဒေသခံတစ်ဦးက ပြောသည်။
Public Service Announcement
“ညနေက ၁၅မိနစ်လောက် ရင်ဆိုင်တိုက်ပွဲဖြစ်တယ်။ စစ်တပ်က သူတို့လူထိတော့ ပြည်သူကိုမဲနေတယ်။ ဒီည တော်တော်လေး သတိထားရမယ်”ဟု ဖားကန့်ဒေသခံတစ်ဦးက ပြောသည်။
ထို့အပြင် စစ်ကောင်စီတပ်သည် ယနေ့ည ၇နာရီခွဲခန့်အထိ လက်နက်ကြီးဖြင့် ပစ်ခတ်နေသည်ဟု ဒေသခံများက ပြောသည်။
ဖားကန့်မြို့တွင် နိုဝင်ဘာ၁၉ရက် နံနက်အစောပိုင်းက KTVခန်းတစ်ခုအတွင်း အရပ်ဝတ်ဖြင့် သီချင်းဆိုနေသည့် စစ်ကောင်စီတပ်ဖွဲ့ဝင်များကို KIA၊PDF ပူးပေါင်းတပ်ဖွဲ့က တိုက်ခိုက်ခဲ့ရာ စစ်ကောင်စီဗိုလ်ကြီးနှစ်ဦးအပါအဝင် ငါးဦးပွဲချင်းပြီးသေဆုံးပြီး သုံးဦးဒဏ်ရာအပြင်းအထန်ရခဲ့သည်။
