တမူးမြို့မှ ကလေးမြို့သို့ ထွက်ခွာလာသည့် စစ်ကောင်စီယာဥ်တန်းတွင် ဖမ်းဆီးခံ နိုင်ငံရေးအကျဥ်းသားအချို့အပါအဝင် အကျဥ်းသား ၁၀ဦးကို စစ်ကောင်စီက လူသားတံတိုင်းအဖြစ် ခေါ်ဆောင် သွားကြောင်း တမူးမြို့ခံများက ပြောသည်။
စစ်ကောင်စီသည် အန္ဒိယနိုင်ငံဘက်မှ တင်သွင်းလာသည့် စစ်လက်နက်ပစ္စည်းများကို တမူး-ကလေးလမ်းမကြီးအတိုင်း သယ်ယူလာပြီး ပြည်သူ့ကာကွယ်ရေးမဟာမိတ်များက တားဆီးနိုင်ရန် ကြိုးစားနေသည်။
ထိုသို့ တိုက်ခိုက်ခံရမည်ကိုကြောက်ရွံ့နေသည့် စစ်ကောင်စီတပ်က အကျဥ်းသား ၁၀ဦးကိုလူသားတံတိုင်းအနေဖြင့် ခေါ်ဆောင်သွားသည်ဟု တမူးမြို့ခံများက သုံးသပ်ပြောဆိုသည်။
“အကျဥ်းသားမိန်းကလေး သုံးယောက်ပါတယ်။ လူသားတံတိုင်းလုပ်ပြီးခေါ်သွားတာ။တချို့နေရာတွေမှာ ရှေ့ကနေ လမ်းလျှောက်ခိုင်းတာ”ဟု တမူးမြို့မှ ပြည်သူ့ကာကွယ်ရေးရဲဘော်တစ်ဦးက ပြောသည်။
Public Service Announcement
စစ်ကောင်စီယာဥ်တန်းသည် တမူးမြို့မှ နိုဝင်ဘာ ၁၅ရက်တွင် ထွက်ခွာလာခြင်းဖြစ်သည်။ ယခုအခါ တမူး-ကလေး အာရှလမ်းမကြီး မိုင်တိုင်(၅၆) ဝန်းကျင်တွင် ရောက်ရှိနေသည်။ယခုရက်ပိုင်းအတွင်း တိုက်ပွဲများ ပိုမိုပြင်းထန်လာနိုင်၍ ကလေး-တမူး လမ်းမကြီးအား ဖြတ်သန်းသွားလာခြင်း လုံးဝမပြုကြပါရန် People’s Defence Force (Kalay)က သတိပေးချက်ထုတ်ပြန်ထားသည်။
