ဆားလင်းကြီး – မုံရွာ ကားလမ်းမကြီးအား ဖြတ်သန်းသွားလာခြင်းမပြုရန် ဒေသတွင်း PDF သတိပေး
စစ်ကိုင်းတိုင်း၊ ဆားလင်းကြီးမြို့နယ်မြောက်ပိုင်းရှိ ထန်းဇင်ကျေးရွာကို စစ်ကောင်စီတပ်က ဝင်ရောက်မီးရှို့ခဲ့ပြီး လူငယ်အချို့ ဖမ်းဆီးခံထားရကြောင်း ဒေသတွင်းသတင်းရင်းမြစ်များက ပြောသည်။
ယနေ့(နိုဝင်ဘာ ၃၀ရက်)မွန်းလွဲပိုင်းက ဆားလင်းကြီးမြို့နယ်၊ ရွှေကုန်းကျေးရွာ၌ တပ်စွဲထားသည့် စစ်ကောင်စီတပ်သည် ထန်းဇင်ကျေးရွာကို ဝင်ရောက် မီးရှို့ဖျက်ဆီးခဲ့ပြီး ဒေသခံပြည်သူအချို့ဖမ်းဆီးခံထားရကာ အမျိုးသမီးနှင့်လူကြီးအချို့ကိုသာ ပြန်လွှတ်ပေးကြောင်း ဒေသတွင်းသတင်းရင်းမြစ် များက ပြောသည်။
“အများအပြားမီးရှို့ခံရတယ်ဗျ။ လူငယ်တချို့နဲ့ ထန်းပုရွာက ပြည်သူတစ်ဦးဖမ်းခေါ်သွားတယ်။ မိန်းခလေးနဲ့ လူကြီးတချို့ ပြန်လွှတ်လိုက်တယ်။ အခုဝင်ရောက် လာတဲ့ စစ်အုပ်စုရဲ့ ယူနီဖောင်းက နက်ပြာတွေလည်း အများစုဝတ်ဆင်ထားပါတယ် ။အများပြည်သူတွေ သတိထားဂရုစိုက်ပြီး သိရှိစေဖို့ပါ”ဟု မျိုးဆက်သစ် လူငယ် Local PDF အဖွဲ့ ပြန်ကြားရေးတာဝန်ခံက ပြောသည်။
ထန်းဇင်ကျေးရွာအနီးတွင် စစ်ကောင်စီတပ်နှင့် ဒေသတွင်းPDFများ ထိတွေ့တိုက်ပွဲဖြစ်ပွားမှုလည်းရှိပြီး အသေးစိတ်အခြေအနေ မသိရသေးပေ။
Public Service Announcement
ဆားလင်းကြီးမြို့နယ်မြောက်ပိုင်း၊ ထန်းဇင်ကျေးရွာဝန်းကျင်တွင် စစ်ကောင်စီတပ်များ ဝင်ရောက်နေပြီး မီးရှို့ဖျက်ဆီးမှုများပြုလုပ်နေ၍ ဆားလင်းကြီး – မုံရွာကားလမ်းမကြီးအား အရေးပေါ်သက်မှတ်၍ ဖြတ်သန်းသွားလာခြင်းမပြုကြရန်နှင့် မဖြစ်မနေသွားလာရမည့်သူများ လမ်းပိုင်းအခြေအနေစုံစမ်းပြီးမှသာ သွားလာကြရန် မြောက်ယမားအထူးတပ်ခွဲ(၁) မြန်မာချေဂွေဗားရားအဖွဲ့က သတိပေးထားသည်။
