မကွေးတိုင်း၊ ပေါက်မြို့နယ်မြောက်ပိုင်းတွင်ဖောက်ခွဲခံထားရ၍ ပျက်စီးသွားသော လျှပ်စစ်မီးကြိုးများအား စစ်ကောင်စီတပ်က လာပြင်စဥ် ထပ်မံမိုင်းဆွဲတိုက်ခိုက်ခဲ့ကြောင်း မြိုင်မြို့နယ် ပြည်သူ့ကာကွယ်ရေးတပ်ဖွဲ့ခေါင်းဆောင် ကိုလက်ျာက ပြောကြားသည်။
ယမန်နေ့ နိုဝင်ဘာလ ၃၀ ရက်နေ့ မွန်းတည့် ၁၂ နာရီခန့်က ပေါက်မြို့နယ်မြောက်ပိုင်း၊ချောင်းကူးရွာအရှေ့ဘက် ၆ဖာလုံခန့်အကွာတွင် မီးကြိုးဆက်ရန် ဖောကား၃စီးဖြင့် လာသော စစ်ကောင်စီတပ်များကို ဒေသတွင်းအဖွဲ့များ ပူးပေါင်းတိုက်ခိုက်ရာ စစ်ကောင်စီတပ်ဖွဲဝင် ၆ ဦးခန့် ထိခိုက်ဒဏ်ရာများ ရရှိသွားကာ ဆေးရုံတင်ထားရကြောင်း မြိုင်ပကဖအဖွဲ့ခေါင်းဆောင် ကိုလက်ျာက ပြောသည်။
ပြီးခဲ့သည့် နိုဝင်ဘာလ ၂၆ ရက်နေ့ နံနက် ၁၁ နာရီ မိနစ်၂၀ ခန့်က ထိုမီးလိုင်းများကို မိုင်းခွဲခဲ့၍ ကြိုးများပြတ်တောက်ကာ လျှပ်စစ်ဓါတ်အား မရတော့ဘဲ ကာကွယ်ရေးပစ္စည်းစက်ရုံများဖြစ်သော ကပစ၂၄နှင့် ကျော ကပစ နှစ်ခုလုံးလုပ်ငန်းများ ရပ်နားထားရကြောင်း မြိုင်ပကဖအဖွဲ့ခေါင်းဆောင် ကိုလက်ျာက ပြောသည်။
“မနေ့တုန်းက လာပြင်တာ။ ပြင်လို့ရမသွားပါဘူး။ ဒီကမြင်တာနဲ့ပစ်ကြတော့။ ပြင်မယ့်နေရာအနီးထိရောက်တယ်။ ကျွန်တော်တို့က သူတို့လာပြင်တာကို စောင့်နေရင်း ပစ်ခတ်မှုဖြစ်တာပါ။ဒီမနက်လည်း ထိတွေ့မှုဖြစ်နေတယ်။”ဟု ၎င်းက ပြောသည်။
Public Service Announcement
ထိုစစ်ဆင်ရေးကို မြိုင်ပကဖရင်း (၁)၊မြွေပွေးပြောက်ကျားအဖွဲ့၊ ကျေးရွာLocalအဖွဲ့များနှင့် ပူးပေါင်းတိုက်ခိုက်ခဲ့ခြင်းဖြစ်သည်။
ပေါက်မြို့နယ်အတွင်းတွင် စစ်ကောင်စီတပ်က ကျေးရွာများအား စစ်ကြောင်းထိုးမီးရှို့ဖျက်ဆီးမှုများ ပြုလုပ်နေသည်။
